Semeton Karangasem ring Kukuh Polih Wantuan Bawi

Semeton Karangasem nampah bawi ring kantor Desa Kukuh, Marga, Tabanan, Soma (30/10).

TABANAN, ISIN-GUMI

Perbekel Désa Kukuh, Kecamatan Marga, Tabanan, I Madé Sugianto nyerahang bawi mabaat 116 kilogram ring semeton Karangasem sané madunungan ring Désa Kukuh. Wusan kaserahang tur katerima olih semeton Karangasem, bawi punika raris katampah ring kantor désa, Soma Pon Dungulan (30/10). Bawi sané kaserahang olih Perbekel Sugianto wantah pican saking krama.

Ketut Purna sané ngwalinin Semeton Karangasem ngaturang suksma majeng ring Perbekel Sugianto santukan sampun urati ring krama sané madunungan. Purna maosang, ngawit semeton Karangasem madunungan ring Désa Kukuh sampun akéh wantuan sane kaserahang. Sekadi panganggé, beras, taluh, toya, jukut, buku tulis, tas, sepatu, kantos susu lan popok. Tiosan ring punika, petugas Puskesmas Marga II ring Désa Kukuh taler sering lunga ka genah krama madunungan nuréksain kesehatan. Angga petugas ring kantor Désa Kukuh taler ngurusang semeton Karangasem sané maoperasi lan ngamar ring BRSUD Tabanan. “Titiang ngwalinin semeton Karangasem sané madunungan deriki dahat ngaturang parama suksma,” ucap Purna, semeton saking kecamatan Kubu.  

Perbekel Désa Kukuh, I Madé Sugianto maosang, wénten 113 jiwa semeton Karangasem madunungan ring Kukuh. Para semeton Karangasem punika jenek ring umah kulawarga lan kulawarga. “Rahina mangkin akéh sampun budal pacang ngegalung. Mangkin kantun 17 kepala keluarga. Wusan Galungan, sami malih mawali ka Kukuh santukan akéh sané sampun polih pakaryan,” ucap Sugianto. Perbekel Sugianto maosang, bawi sané kaserahang ring semeton Karangasem wantah pica saking kanti sané jenek ring Tabanan. “Dumogi wénten anggén Galungan,” teges Sugianto. (Nang Satria)