Truk Tua Nyungkling di Péngkolan Bajera

Kapolsek Selemadeg Kompol Nyoman Sukanada nureksain truk sane polih nyungkling ring pengkolan Desa Bajera, Anggara Kliwon Medangsia (25/4)

TABANAN, ISIN-GUMI

Truk Mitshubisi nomor polisi S 9227 PB nyungkling di péngkolan Banjar Dinas Bajera Kaja, Désa Bajera, Kecamatan Selemadeg, Tabanan, Anggara Kliwon Medangsia (25/4) semeng. Truk sané kasopirin olih Wiyono, 53, saking Sidoarjo, Jawa Timur punika nyungkling santukan truk ipuné tua. Bédag benyah lan cacis sampun berek. Aget Wiyono nénten ngemasin mati sangkaning ipun keni baya ring margi agung Dénpasar-Gilimanuk.

Kapolsék Selemadeg, Kompol Nyoman Sukanada nuturang, truk sané ngangkut tisu mabaat 4,5 ton puniki nyungkling sawatara jam 05.50 Wita. Sadurung nyrégeg tur nyungkling, truk punika rauh saking kauh (Gilimanuk) ka Dénpasar. Wiyono mamargi saking Surabaya pacang ngirim tisu ka Dénpasar. “Sadurung luas, ipun sampun maduwé sipta jelék,” ucap Kompol Sukanada.

Sipta kaon punika indik jelanan truk, sadurung bak kadagingin tisu, prasida maubetan lan mabukakan sakadi biasané. Nanging risampun pacang mamargi ka Dénpasar, nadak sara jelanan truké tan prasida kaubetang. “Jelanan truké lantas kategul baan tali,” Kompol Sukanada nerangang. Ring salantang margi sané kaentasin, Wiyono taler maduwé keneh kaon. Santukan truk puniki naenin katabrak olih krama sané negakin montor ring Jembrana kantos ngemasin séda.

Ri samping jejeh nyetir, truké puniki sampun tua, tan becik malih bakta luas. Bédag truk sampun benyah. Cacis taler sampun berek nika mawinan rikala méngkol misi ngamenékang, bédag truké macepol, batan sibak raris truké nyungkling. “Truké suba tua nanging kabakta luas,” tegas Kompol Sukanada.  * Van Satria