Mobil Ayla Makeber Lantas Malingeb di Tengah Cariké

Mobil Ayla DK 775 GT kadéreék uling cariké, di Banjar Bakisan, Désa Dénbantas, Kecamatan Tabanan, Sukra (28/5). Potrékan druwén Panji Arta, kaambil saking Facebook.

TABANAN, ISIN-GUMI

Mobil Ayla DK 775 GT kasopirin olih I Ketut Ali Wardhana, 36, makeber lan malingeb di tengah cariké di Banjar Bakisan, Désa Dénbantas, Kecamatan Tabanan, Sukra (28/4) ngedas lemahé. Satondén malingeb ka cariké, mobile nabrak punyan kayu. Sopir selamet yadiastun mobilné matanceb lan malingeb.

Krama di Banjar Bakisan nyambatang, mobil matekap di cariké sawatara jam 00.15 Wita. Kala ento, mobilé teka uling kaja, plaibné becat. Neked di péngkolan, mobilé nyrégség ka tengébot lantas nabrak punyan kayu. “Mobilé makeber tegehné a méter lantas ulung malingeb ka tengah umané,” ucap krama. Sopiré nyidang pesu padidiané uling tengah mobilné. Pajalanné srayang sruyung, blokotan uyak nyanyad. “Mirib punyah sopire, bon bibihné arak dogén,” imbuh kramané.

Mobil Ayla DK 775 GT malingeb di cariké, Banjar Bakisan, Désa Dénbantas, Kecamatan Tabanan, Sukra (28/5). Potrékan druwén Panji Arta, kaambil saking Facebook.

Ali Wardhana katululingin olih kramané, katundén kayeh lantas kaateh mulihné ka Banjar Delod Rurung, Désa Delod Peken, Kecamatan Tabanan. Manut kramané, Ali Wardhana saking Banjar Tunjuk Tengah, Désa Tunjuk, Kecamatan Tabanan, nyentana ka Banjar Delod Rurung, Tabanan. Ipun tusing ajak maubad ka rumah sakit kerana tusing ada kénkén yadiastun ulung mapangsegan ka tengah cariké. Manut matuan ipuné, Putu Kusuma, mantuné mulih ka Banjar Tunjuk Tengah pacang nyemak mobil ané siliha ajak beliné. Lacur dugasé majalan mulih labuh di Banjar Bakisan. Ipun nyambatang mantuné magaé di kapal pesiar. Van Satria