Pak Bos Mati Jekjek Gajah

Potrekan gajah, kaambil saking internet

SEMARAPURA, ISIN-GUMI

Bos Bakas Levi Rafting dan Elephant Tour di Banjar Kawan, Désa Bakas, Kecamatan Banjarangkan, Klungkung, I Nyoman Lévi Suwitha, 60, mati jekjek gajah, Sukra (28/4). Dugas ento, Nyoman Lévi Suwitha ngemangin gajahné mamahan, sawatara jam 10.20 Wita. Nadak sara, gajah ané ngamah who-wohan surudan banten ento ngamuk. Nyoman Lévi lilit temulélé gajah tur kapangsegang ka tanahé kanti pinggan.

Bos rafting ané nyelék ati lantas plaibanga tekén buruhné ka RSUD Klungkung di Kota Amlapura. Nanging tan sida katulungin, Nyoman Lévi Suwitha ngemasin mati satondén neked di rumah sakit. Manut panuréksan dokter, bos rafting puniki matatu di sirahné sadawa 5 cm, linggahné 3 cm, lan dalemné 2 cm. Ada masé tatu di tangkahné salantang 3 cm, linggah 1 cm, lan dalemné 3 cm. kéto masé matatu di paha lan muanné. Mayit nglantur ka kirim ka RSUP Sanglah, Dénpasar.

Mayit tiba ring RSUP Sanglah, Dénpasar sawatara jam 14.30 Wita. Saking panuréksan dokter, kacingakun beréd bunter sakadi telapak batis gajah ring basang muang dada. “Ada lad enjekin batis gajah, dua di tangkah lan abesik di basangné,” atur Kepala Bagian SMF Kedokteran Forensik RSUP Sanglah, dr Ida Bagus Putu Alit sakadi kaambil saking www.nusabali.com. Tiosan ring punika taler lung ring paha tengawan lan tengébot

Kapolsék Banjarangkan AKP Ni Luh Wirati nerangang, dinané punika Nyoman Lévi wau rauh saking Banjar Bet Ngandang, Kelurahan Sanur, Dénpasa Selatan. Neked di Banjar Kawan, Désa Bakas sawatara 09.00 Wita. Ipun maan ngorta sareng buruhné, raris ngojog kandang gajah. “Manut buruhnyané, daweg ngemaang gajahé mamahan, ipun sungkan. Raris kaamuk gajah,” ucap Kapolsék Luh Wirati.

Wakil manajemen wahana Bakas Levi Rafting dan Elephant Tour, I Nyoman Merta, nungkasin bos ipuné ngemasin mati kaamuk gajah. Manut ipun, bosnyané  sungkan hipertensi lan sakit jantung. Sadurung bencana punika, Merta ngaku nyingakin sané soleh ring paningalan bosné. “Manawi dané kenyel santukan maduwé karya adat,” ucap Merta. Ipun nerangang, bosnyané sampun ngawitin utsaha Levi Rafting dan Elephant Tour di Banjar Kawan, Désa Bakas, 12 Oktober 2002. Kantos mangkin maduwé 8 gajah. Tiosan ring gajah taer maduwé beburonan lianan sakdi kedis.

Kaungingang Nyoman Lévi sayang pisan ring ubuh-ubuhan ipuné. Nika mawinan ngutsahang nengokin ubuh-ubuhanné yadiastun ngajak saking Sanur ka Klungkung. Van Satria

Orti puniki kaketus saking www.nusabali.com