 |
| Money changer sane karampok begal. Potrekan druwen www.nusabali.com |
MANGUPURA, ISIN GUMI
Petang diri bégal masenjata pistol ngrejek money changer utawi penukaran
pipis PT Dirgahayu Valuta Prima ring kompleks pertokoan Segitiga Mas Nomer 5
Jalan Bypass Ngurah Rai, Kuta, Badung, Saniscara (4/2/2017) sawatara jam 10.55
Wita. Kapapat bégal punika nodongang pistol ring karyawanné. Kalimang diri
karyawanné taler limané kacangkling antuk borgol, bibih lan paningalanné
katekep aji lakban. Saking genah money changer puniki, bégalé prasida mlaibang
jinah kantos Rp 811 yuta.
Kapapat diri bégal puniki macelep ka money canger PT Dirgahayu Valuta
Prima ri kala pegawai mara nyumunin magaé. Semengan punika, sinalih tunggil
karyawan, I Putu Tapa, 46, sedeng menahin lampu di tongos téller kasaksiang
olih tigang diri pegawai tiosan inggih punika I Putu Andika Putra, 18, I Nyoman
Budiarta, 26, lan Ida Bagus Putu Winda, 24. Nah, dugas ento tigang diri bégalé macelep tur nodongang
pistol ka pegawainé. Sinalih tunggil bégalé nundén pegawainé ané menahin lampu
apang tuun tur medem di natah kantoré.
“Turun,
turun, tiarap, tiarap (tuun, tuun, medem,
medem),”
ucap sinalih tunggil bégalé sambilanga nodongang pistol
ka Putu
Tapa lan timpal-timpalnyané. Salanturné, sinalih tunggil bégalé majalan ka dorin kantoré tur
nodongang pistol ring pegawai tiosan, I Ketut Budhairdi, 49, ané nedeng malejer di arep WCné. Ipun taler katitahang
tiarap utawi medem. “Jadi semua ada
lima karyawan ini disuruh berkumpul di salah satu ruangan yakni ruangan teller
oleh keempat pelaku ini (Makasamian wénten
limang diri pegawai katundén mapupul ring sinalih tunggil kamar teller olih
kapetang diri bégalé punika,” atur Kapolrésta Dénpasar Kombes
Pol Hadi Purnomo kadampingin Kapolsék Kuta Kompol I Wayan Sumara.
Katerangan, kapetang diri bégal punika lantas morgol liman pegawainé. Bibih
lan paningalan pegawainé kalakban apang tusing sida ningalin tur makraik ngidih
tulung. Kalimang diri pegawai punika raris kacelepang ka betén méjané tur
kaawasin olih sinalih tunggil bégalé sambilanga nodongang pistol. Salanturnyané
tigang diri bégaléé lantas ngalihin tongos nyimpen pipis yakni sorog-sorogan méja
teller lan brankas. Di tengah brankasé bégalé nyemak pipis Rp 733 yuta. Ring kalih
sorog-sorogan méja télleré, bégaléé nyemak pipis Rp 36 yuta lan Rp 30 yura. Jinah
valas sawatara Rp 12 yuta taler kaambil. “Sami jinahé kaambil sawatara domas yuta
rupiah,” atur
Kombes Hadi Purnomo.
Sadurung malaib saking genahé punika, para bégalé puniki nakonang tur
nyemak server CCTV ring pegawai sané kasandra. Bégalé taler nyemak server tur
kaplaibang.
Aget, Ida Bagus Putu Winda sané tanganné kaborgol asiki prasida ngelésang
borgol tur ngwantu timpal-timpalnyané ngelésang borgol lan lakban. Raris
pegawai money changer puniki ngalpur ka Polsék Kuta. “Angga Polsék lan Poltabes
nepukin 7 borgol, tas selem, lan lakban,” imbuh Kombes Hadi Purnomo. Sané
mangkin polisiné kantun nyelehin lan mautsaha ngepung para bégal punika. Kadék Sugianto
Kaketus saking www.nusabali.com
Tidak ada komentar:
Posting Komentar