 |
| Genah matajen ring Pura Dukuh, Desa Tiying Gading, Kecamatan Selemadeg Barat, Tabanan. Potrekan puniki kaambil warsa 2011. |
TABANAN, ISIN-GUMI
Krama Banjar Dukuh, Désa Tiying Gading,
Kecamatan Selemadeg Barat, Tabanan, sampun uning ngadokang tajen lémpas
tekéning Undang-Undang. Nanging yén ten ngadokang tajén, utamané di Pura Dukuh
tigang rahina sadurung Galungan, kramané keni lepetan. Sampun ping kalih
mabukti, ri kala tan ngadokang tajen bé céléng sané katampah dina Penampahan
Galungan setata usak. Daging céléng mabaas utawi mauled.
Ngawit punika,
krama tan purun tan ngadokang tajen ri kala tigang sasih sadurung Galungan.
Nika mawinan duk Inspektur Jénderal
(Irjen) Pol Madé Mangku Pastika dados Kapolda Bali, tajen ring Pura Dukuh
naenin kaawasin satu peleton Dalmas Polda Bali. Pamangku Pura Dukuh, Nyoman
Sunaryadi nerangang, ngadokang tajen nyabran tigang dina sadurung Galungan
wantah bisama tur naur sesangi panglingsir nguni. Duk warsa 1950-an, tigang
diri krama ngabas alas kaanggén tegalan tur mamondok derika.
Ri sampun krama tiosan mireng wénten krama
jenek ring alasé punika, kakalih kulawarga nyarengin ngalgal alas ngwangun
tegalan tur mamondok derika. Krama dura désa lantas ngadanin genahé punika
padukuhan, santukan alasé kalintang tenget tur wénten limang diri kulawarga
purun jenek derika. Raris limang diri kulawarga punika duk tanggal 1 Januari
1962 ngwangun palinggih Pura Dukuh linggih Hyang Dukuh Sakti.
Kasuwén-suwén, tegalanné uyak merana. Napi ja
pamula-mulanné nénten ngasilang napi. Magenep sampun kautsahayang ngulahin
meranané nanging guminé ngancan gerubug. Raris panglingsir nyeraya ring
Palinggih Pura Dukuh. Limang diri panglingsir punika masesangi yéning meranané
ical, sumanggup mapenauran ngwangun Pura Subak Abian. Sayuwakti, meranané
ngancan ical, panglingsiré raris ngwangun Pura Subak.
Ri kala ngwangun
Pura Subak Abian, kramané ngadokang
tajen ring Pura Dukuh, tigang dina sadurung Galungan, Redité Pahing Dungulan.
Tajen punika raris nglantur nyabran ngenem bulan apisan. Risampun medal
Undang-Undang tak dados ngadokang tajen, krama Dukuh tan purun matajen. Lacur,
rikala dina penampahan Galungan, Anggara Wagé Dungulan, makasami céléng sané katampah
ring wewidangan Banjar Dukuh ebéné usak, mauled. “Sami bawi sané katampah usak
mesuang uled. Sami éran santukan céléngé sadurung katampah seger,” tutur Mangku
Sunaryadi.
Panglingsir
raris ngrembug. Manut pawisik tur lelintihan ngwangun padukuhan, wénten bisama pacang ngadokang tajen ngenem
bulan apisan, tigang dina sadurung Galungan. Krama raris paum tur nunas izin ke
Polda Bali lan Gubernur Bali. Ri kala nunas izin punika, krama mébérang
kaberebehan lan bukti yén tan ngadokang tajén. Murdaning jagat ring gubernuran
lan Polda Bali raris micayang ngadokang tajen. Daweg Kapolda Bali Irjén Madé
Mangku Pastika, kramané malih jejeh ngadokang tajén. Malih mabukti, daging céléng
usak rikala katampah ring dina Penampahan Galungan. Nika mawinan krama Banjar
Dukuh ngancan precaya, baya yéning tan ngadokang tajen di Pura Dukuh.
“Risampun polih
izin, warsa 2004, tajen kaawasin olih satu peleton Dalmas Polda Bali,” ucap
Mangku Sunaryadi. Minab kerana ngadokang tajen sangkaning rasa jejeh lan tan
manah tan tulus santukan kaawasin polisi, malih ngewetuang biuta. Kramané setata mayegan yadiastun nénten pikobet
ageng. Jeg makejang mapuikan.
Nika mawinan, kramané malih nunas izin mangda
tajenné tan kaawasin polisi. Kaceritayang, genah ngadokang tajen nénten dados
kisidang. Naenin kakisidang mangda akéhan babotoh lan kramané nyidang matajen.
Nanging lacur ngwetuang buut. “Natar pura cupit, babotoh ngancan ngakéhang
ngrauhin nika mawinan genah matajén kakisidang. Jeg
setata kramané mauyutan,” ucap Mangku
Sunaryadi. Sampun ping ngedil kalangan tajen kakisidang, ping ngedil taler kramané
mapuikan. Nika mawinan kantos mangkin tajen setata kalaksanayang ring natar
pura. Ki Sanak
Tidak ada komentar:
Posting Komentar