Wénten Palinggih Batu Marupa Lumbung ring Pura Ulun Suwi Batu Lumbung

Pura Luhur Kahyangan Jagat Ulun Suwi Batu Lumbung Desa Pakraman Soka, Penebel, Tabanan

TABANAN, ISIN-GUMI

Pura Kahyangan Jagat Luhur Ulun Suwi Batu Lumbung, magenah ring Désa Pakraman Soka, Désa Senganan, Kecamatan Penebel, Tabanan. Pura ring bongkol Gunung Batukaru puniki maduwé 50 yéh anakan sané kaanggé mretanin jagat Tabanan. Atenga yéh anakan puniki kaolah olih Perusahaan Daérah Air Minum (PDAM) Tabanan. Atenga malih kaanggén krama subak anggén toyan carik. Pura puniki malelintihan sareng Danu Tamblingan ring Désa Pancasari, Kecamatan Sukasada, Kabupatén Buléléng. 

Manut prawartaka karya, I Wayan Juli Asrawan, piodalan di Pura Kahyangan Jagat Luhur Ulun Suwi Batu Lumbung ngenem sasih apisan ring Wrespati Umanis Wuku Sinta, awai sasampun Pagerwesi. Piodalan di pura puniki setata kalaksanayang pujawali agung. Santukan ring pura puniki kapercaya stana utawi linggih Ida Bhatara Manik Mas Maketel utawi Déwi Sri. Ring pura puniki wénten palingih marupa jineng malakar aji batu. Nika mawinan pura puniki kawastanin Pura Kahyangan Jagat Luhur Ulun Suwi Batu Lumbung. Artosné, wénten palinggih batu marupa jineng utawi lumbung. Jineng wantah genah petani nyimpen padi lan linggih Déwi Sri. 

Juli Asrawan ngimbuhin, tiosan palinggih batu marupa jineng, ring wewidangan pura wénten 50 yéh anakan. Toya, ring mitologi Hindu kapercaya wit kahuripan pinaka pratiwimba Déwa Wisnu, sakti Déwi Sri. Tiosan kaanggé olih PDAM lan subak, yéh anakan sané wénten ring tengahing wana kapercaya dados ubad. Sampun akéh krama nunas ubad tur seger sangkaning toya mahotama ring Pura Kahyangan Jagat Luhur Ulun Suwi Batu Lumbung.

Pura puniki karasa madurgama pisan santukan doh saking kramané jenek. Ngrereh pura puniki, pamedek nglintangin margi salantang 2,6 kilométer saking pateluan Désa Soka. Pamedek muspa majeng daksina utawi kelod, santukan palinggih utama majeng kalér. Pura puniki tan maduwé panyengker ring jeroan. Pura dados siki sareng alas. Wantah ring sisi kauh jeroan wénten panyengker.

Di Pura puniki wénten 7 palinggih. Inggih punika palinggih kawitan batu marupa jineng, payogan Ida Bhatara Luhur Tamblingan, Bukit Puhun, Ratu Nyoman Sakti Pengadangan, Ratu Nyoman Dalem Sugih, Taman Sari, lan piyasan. Pura puniki kaempon olih krama Désa Pakraman Soka sawatara 350 kulawarga. Désa Pakraman Soka ngwidangin kalih banjar adat inggih punika Soka Kanginan lan Soka Kawan. Ki Sanak