SEMARAPURA, ISIN-GUMI
I Ketut Simpen Adnyana, 43, ngulah pati nusuk raga nganggon temutik lan nginem wisia di jumahné, Banjar Kaja Kangin, Désa Tegak, Kecamatan/Kabupatén Klungkung, Anggara (5/7) sanja. Ipun katarka ngulah pati kerana stress mapan sakitné tusing karuan seger. Kocap saking 8 tiban, Simpen ngraksa sakit kencing manis utawi diabétes kanti mamerag.
Mémén ipuné, Ni Madé Rai, 100, sané nyingakin Simpen Adnyana nusuk raga nganggon temutik sawatara jam 17.30 Wita. Nyingakin pianakné ngulah pati, Rai kraik-kraik ngidih tulung nanging umahné kabenenangan suwung. Ipun lantas ngalih lan nyambatang tekén pianakné, Kadé Widiada, 49, sané sedeng nguwopin di jumah pisagané. Widiada lantas mulih tur nepukin adinné nyelepetég uyak getih, tangkahné macéblong matatu. Tingalina masih uling bibih adinné mesuang didih.
Widiada ngénggalang mlaibang adinné ka Rumah Sakit Klungkung. Nanging sawatara jam 22.30 Wita, Simpen Adnyana ngemasin lacur. Manut somahné, Kadék Sanuarti, 41, Simpen Adnyana sampun ngraksa sakit diabétes uling 8 tiban. Sampun ping kalih ngamar di RS Klungkung nanging sing karuan seger. Samalihé ngancan ngameregang kanti baatné 40 kilogram. Kulawarga sampun las tekén Simpen Adnyana lacur ulian ulah pati.
Kapolsék Kota Klungkung, Kompol Madé Karsa matutang buut di kulawarga Simpen Adnyana, krama saking Banjar Kaja Kangin, Désa Tegak, Klungkung punika. “Manut kulawarga, ipun ngraksa sakit kencing manis. Sangkaning sakitné tan karuan seger, ipun stréss, nika katarka ipun ngulah pati,” ucap Kompol Madé Karsa. Dané ngawewwhin, sadurung ngurek raga, Simpen polih ngirim SMS tekén sametonné, ngorahang ngulah pati kerana sakit kencing manis. Ki Sanak
Tidak ada komentar:
Posting Komentar