Baluan Jegég Ngmaling Laptop Kéwala Sing Bisa Nganggon

Wakapolres Tabanan Kompol Leo Martin Pasaribu dugas ngrilis kasus di Mapolres Tabanan, Buda (13/7).

TABANAN, ISIN-GUMI

Polrés Tabanan ngejuk baluan jegég uling Jember, Jawa Timur, AG, 29, kerana ngmaling laptop pisaga kosné di Jalan Katamso No 12, Banjar Taman Sari, Désa Delod Peken, Kecamatan/Kabupatén Tabanan, Soma (11/7). AG ngmaling laptop, HP, kaméra, lan tivi gelahné Inpras Setiyo Widodo, kala pisaga kosné ento mudik ka tanah palekadanné di Jawa. Mapan sing bisa nganggon laptop maimbuh laptopé jelék, AG ngulihang laptopé ento.

Manut Waka Polrés Tabanan Kompol Léo Martin Pasaribu, AG, baluan jegég uling Jember ento kajuk 13 jam disubané maan laporan uling Inpras Setiyo ané kélangan laptop, kaméra, HP, lan tivi di kamar kosné. Disubané nuréksain utawi olah TKP, polisi cenidra tekéning AG, dagang és cincau dauh SMPN 2 Tabanan ané mapisaga kos ajak Inpras. “Mara turéksain, AG ngaku ngmaling kerana nyaratang pipis anggon mayah buruhné di tongos madagang és,” ucap Kompol Léo kala ngrilis kasus pencurian lan pemberatan (curat) ento di Mapolrés Tabanan, Buda (13/7).

AG ngaku ngmaling padidiana. Apang nyidang macelep ka kamarné Inpras, ia ngalih tukang kunci idihina tulung nganti umah sereg pintu. Ipun mapi-mapi ané ngelah kamaré tur ngéka daya kélangan sereg utawi kunci. Disubané umah sereg pintu kaganti, ia sakabesik ngajang gelahné Inpras ka kamar kosné. Kerana sing bisa nganggon laptop maimbuh computer ténténg pegawé kantor pajak ento jelek, AG buin ngejang di tongosé si jumu.

“Disubané teka uling mudik, Inpras tangkejut kerana sing nyidang muka pintu aji seregné. Ia lantas nyilih sereg serep tekén tuan kosé, masé sing nyidang mukak. Mara segek, éh jelanané sing masereg maimbuh umah kunciné uwug,” imbuh Kompol Léo. AG ané kajuk kena Pasal 363 mapenjara salami 9 tiban. “Barang-barang ané malingé enu tileh kerana ia sing nawang tongos ngadep,” imbuh Kompol Léo. Ki Sanak