Jero Penyarikan Sengkala Sénggot Sampi

Nengah Meter tusing nyidang negak sasukat senggot sampi.

TABANAN, ISIN-GUMI
Jelé sajan nasibné I Nengah Méter, 60, dugas ngemangin sampiné mamahan, Redité (24/7). Kala ngemangin sampiné taluh di bada, ipun kasénggot kanti labuh. Maimbuh kajekjek sampi kanti tusing nyidang makiba. Aget ada krama nepukin tur nulungin. Nengah Méter lantas kaplaibang ka Rumah Sakit Tabanan.
Nengah Méter wantah Jero Penyarikan di Pura Merajapati Désa Pakraman Kediri, Kecamatan Kediri, Tabanan punika kayang jani tusing nyidang makiba. Awakné kekeh kerana jekjek sampi. Jero Méter nuturang, dugas ento majalan batis ka bada tongosné sampiné kategul di delod Sétra Désa Pakraman Kediri sawatara jam 12.00 Wita, ketah kasambat tengai tepet. Neked di bada, Jero Méter lantas ngeplokang taluh. “Mara ukuna ngmaangin ngamah, tiang sénggota,” tutur Jéro Méter, krama Banjar Sema, Désa Pakraman Kediri.
Jero Méter nyritayang pahané kasénggot ané ngawinang ipun labuh maglebug. “Tiang masé jekjek sampi maimbuh paid talin sampi. Tiang sing nyidang ngomong ngidih tulung, bayun tiangé lemet,” ucap Jero Méter. Tusing buin makeloné ada anak liwat tur nepukin Jero Méter jekjek sampi lantas ngidih tulung tekén krama lénan. Jero Méter prasida kaselametang tur kaplaibang ka rumah sakit. Sawatara jam 17.00 Wita, Jero Méter kadidiang mulih.
Kayang jani Jero Méter tusing nyidang maglibegan, sajaba pules di pasaréan. Jero Méter nuturang mula demen ngubuh sampi lan ngaé sampi kaung. Biasané sampi kaung kaubuh uling cenik. Tumbén jani meli bibit sampi lakar kauh, atiban ané suba liwat aji Rp 10.800.000. Disubané dadi kaung, akejresan maan upah Rp 100 tali. “Tiang mula demen ngubuh sampi. Jani ngelah sampi 5 ukud, 4 ukud luh, aukud sampi muani anggon kaung,” tuturné. Ki Sanak