AMLAPURA, ISIN-GUMI
Minab, Pura Dadia Bumbungan ring Banjar Belong, Désa Pakraman Ulakan,
Kecamatan Manggis, Karangasem, pinih sungsang ring Bali. Santukan duk nguni
kantos mangkin pangempon pura wantah 3 kulawarga. Napi mawinan?
Manut Pamangku Pura Dadia Bumbungan taler kelian pamaksan, Jro Mangku
Nengah Kukuh, pangempon saking nguni 3 kulawarga santukan méweh ngarya sentana.
Naenin tigang kulawarga puniki nakénang napi ngranaang kéweh ngelah pianak
masarana ngewacakang, nanging saking niskala nénten naenin polih pisaur. “Méweh
pisan titiang sareng kalih kulawargan titiangé ngaé pianak. Nika mawinan turun temurun pangempon pura wantah
tigang kepala keluarga,” atur Mangku
Kukuh sakadi kacungkil saking www.nusabali.com.
Mangkin, 3 KK krama
pangempon Pura Dadia Bumbungan wantah kulawarga I Kadék Suyasa, kulawarga Jro Mangku Kukuh, lan
kulawarga I Putu
Ngurah Suantara. Jro Mangku Kukuh maduwé
pianak petang diri.
Saking 4 sentanané, sané lanang wantah adiri. Sentana
lanang punika pacang nerusang atah-ayah dados krama pangempon Pura Dadia
Bumbungan. Kadék Suyasa maduwé
sentana 2 diri.
Putu Suantara maduwé pianak adiri, luh. “Saking tigang kulawarga puniki wénten 15 jiwa saking
panglingsir kantos raré,” ucap Mangku Kukuh.
Jro Mangku Kukuh nyeritayang, belin danéné kantos ngantén ping tiga. Nanging ngantén ping péndo puniki
nénten maduwé sentana. Wawu ngantén ping tiga kapica sentana. “Titiang sareng kulawarga setata kéwéh nunas sentana.
Bapan tiangé maduwé pianak adiri, wantah titian kémanten. Pekak titiangé taler
maduwé pianak lanang adiri, inggih punika bapan titiangé. Terus sakadi punika nika mawinan pangempon pura
setata tigang kulawarga,” atur Jro Mangku Kukuh.
Manut Jro Mangku Kukuh, krama pangempon tigang kulawarga di Pura Dadia
Bumbungan wantah tigang kulawarga ngawit warsa 1967. “Daweg punika (warsa 1967)
panguntat makarya mamungkah lan nubung daging.” Karya piodalan Pura Dadia Bumbungan
awarsa pisan ring Purnamaning Kapat. Ri kala piodalan, sané makarya
banten kadum sareng tiga kulawarga.
Jro Mangku Kukuh pinaka pamangku lan Kelian Pura Dadia Bumbungan polih amongan lebihan muput upakara, lan juru sapuh.
Dumun, piodalan
di Pura Dadia Bumbungan kalaksanayang ping kalih a tiban, Buda Wagé Kelawu lan Purnamaning
Kapat. Kerana krama pangempon wantah
3 KK, pangayahé leleh piodalan ping kalih nika mawinan cumpu
ngaturang pujawali apisan ring Purnamaning Kapat. Ri kala piodalan, Ida
Batara di Pura Dadia Bumbungan nyejer selami
4 rahina. Selami punika
nénten wénten bebalihan, santukan krama sané makemit wantag
3 diri. Ki Sanak
Tidak ada komentar:
Posting Komentar