Gudang BP3K Penebel Bah Mabriug

TABANAN, ISIN-GUMI
Gudang Balai Penyuluhan Pertanian, Perikanan, dan Kehutanan (BP3K) Kecamatan Penebel magenah di Banjar Buruan Tengah, Desa Buruan, Kecamatan Penebel, Tabanan, uwug mabriug, Sukra (1/7) peteng. Wewangunan gudang tua puniki uwug corcor ujan bales. Perkakas pertanian sane masimpan di gudang sami maurug uwug-uwugan wewangunan.
Kepala Kantor BP3K Kecamatan Penebel, I Nengah Widastra nerangang, gudang panyimpenan piran pertanian punika wau kauningan mabriug, Saniscara (2/7). Daweg puniki, sinalih tunggil pegawai ke kantor nureksain entik-entikan. "Ipun sane ngwangsitan wangunanne uwug. Titiang lantas luas ka kantor nyingakin," ucap Widastra sakadi kacungkil saking www.nusabali.com, Soma (4/7). Disubane neked di kantor dane manggihin wewangunanne sampun uwug, aget dugas bah mabriug tusing nepen kantor UPTD Peternakan ri sampingne.
Widastra nerangang, wangunan 2x9 meter puniki sadurung kaangge gudang wantah kantor BP3K Kecamatan Penebel. Duk petang warsa sampun lintang kaangge gudang santukan wenten wangunan anyar. Gudang punika taler kaangge kantor olih UPTD Peternakan lan UPTD Perikanan ri nuju wenten ngrincikang wewangunan ring ka kalih kantor instansi punika. "Mangkin dados gudang pertanian, sami piranti pertanian kaurugin benyahan wewangunan," imbuh Widastra. Dane mapangapti gudang puniki gelis kabecikang. Santukan nyabran sasih wenten kabupaten/kota ring Bali utawi dura Bali study banding pertanian ke BP3K Penebel. Ki Sanak