Bédéng Pondok Pesantrén di Kerambitan Puun, 2 Motor Milu Puun

Dedy nujuhang montorne ane puun. foto druwen www.nusabali.com

TABANAN, ISIN-GUMI

Wangunan bédéng di Pondok Pesantrén Layorba druwén Haji Ketut Jamal di Banjar Meliling Kawan, Désa Meliling, Kecamatan Kerambitan, Tabanan, puun, Wraspati (30/6) semeng. Saisin bédéng puun, panganggo, STNK, muang 2 motor dadi abu. Aget limang diri buruh sané sirep ngengkis selamet yadiastun bangun kapupungan. Makejang puun, wantah sarung neket di awak ané selamet.

Manut buruh proyék, Dédy Prasetyo, 30, saking Dusun Gaplék Barat, Désa Suci, Kecamatan Panti, Kabupatén Jember, Jawa Timur, nyambatang api dumilah ento sawatara jam 06.00 Wita. Ia sing nawang unduk kerana dugas api gedé di bédéng ia enu ngengkis pules ajak papat diri timpalné. “Timpal tiangé, I Anwar ané nundun. Ia mara teka uling Sholat nepukin bédéngé puun,” ucap Dédy. Ipun nyambatang, dugas ia lan timpalné paturu buruh enu pules di bédéng apiné suba gedé. Nanging ia lan timpal-timpalné tusing ngrasayang kebus. “Makejang bangun maklalingan nylametang raga,” imbuh Dédy.

Ipun nyambatang tusing nyidang nylametang apa, sajaba nylametang déwék padidi. Montor ipuné, Yamaha FU puun. Kéto masih montor Mioné Anwar puun. “Enu sarung ané masaluk dogén ané selamet. Makejang puun,” ucap Dédy. Ipun narka, bédéng malakar aji triplék punika puun ulian korsléting listrik. Pemadam kebakaran teka, nanging bédéngé suba puun dadi abu. Kapolsék Kerambitan Kompol I Gedé Madé Punia matutang buuté punika. “Kakalih montor lan pangango di bédéngé milu puun. Mirib ulian korsleting listrik,” ucap Kompol Punia kacungkil saking www.nusabali.com, Sukra (1/7). Ki Sanak