SMPN 2 Marga Nyolahang Cupu Manik Astagina

Siswa lan guru SMPN 2 Marga nyolahang sendratari Ramayana mamurda Cupu Manik Astagina, Buda (8/6).

TABANAN, ISIN-GUMI

Perpisahan SMPN 2 Marga ring Désa Kukuh, Kecamatan Marga, Kabupatén Tabanan ramia pisan, Buda Cemeng Klawu (8/6). Akéh igel-igelan kasolahan utamané séndratari Ramayana mamurda Cupu Manik Astagina. Séndratari puniki kasolahang olih para siswa lan guru ring SMPN 2 Marga.

Manut Kepala SMPN 2 Marga, Gedé Darmika, séndratari puniki pinaka cihna guru lan para siswa di sekolah adung tur saling tulung. Wénten petang diri guru lan 7 siswa sané ngigel ring séndratari puniki. Panabuh 35 diri makasamian siswa SMPN 2 Marga. Punika taler dalang lan gérong makasami guru ring sekolah punika. “Titiang uyang ten nyidang sirep minehang perpisahan puniki kerana galah muruk takejep maimbuh sorot tivi,” ucap Darmika.

Darmika nerangang, petang diri guru sané nyarengin ngigel inggih punika Ni Luh Gita Marhaéni (Déwi Indradi), Wayan Subiantara (Sugriwa), I Gusti Bagus Oka Adiputra (Subali), lan I Wayan Éka Sanjaya (Resi Gotama). Pinaka dalang I Nyoman Sukarta kasarengin rabiné dados gérong, Nyoman Ratni. “Garjita pisan manah titiangé santukan sasolahan séndratari Ramayana Cupu Manik Astagina mamargi antar,” ucap Darmika.

Darmika ngawewehin, para siswa lan guru sané nyolahang Cupu Manik Astagina wantah maduwé galah 7 dina muruk di sekolahan. Sekolah ngrauhang Madé Wardana lan okanné, Komang Ari Wisa Kéndraniati mangda ngurukang tabuh lan igelanné. Ipun makakalih taler kawantu olih guru ring SMPN 2 Marga inggih punika Nyoman Sukarta, Nyoman Ratni, Ni Madé Suari, Luh Gedé Marhaéni, lan Luh Gedé Éka Suryani.

Panguruk tabuh, Madé Wardana taler nyambatang garjita ring manah. Santukan maka 35 diri siswa sané kaurakang tabuh séndratari gelis encep nuduk gending. “Titiang kapica galah wantah 7 lemeng, nanging alit-alité ring SMPN 2 Marga prasida nuduk gending kerana sami sampun maduwé dasar,” ucap Wardana.

Cupu Manik Astagina punika nyeritayang buut ring pasraman Resi Gotama. Déwi Indradi sané polih pica Cupu Manik Astagina saking Bhatara Surya micayang pusaka punika ring Déwi Anjani, okané pinih duur. Raris pusaka punika karebut olih Sugriwa lan Subali. Sangkaning ngrebut Cupu Manik Astagina, Sugriwa lan Subali raris masiluman dados wré. Makatiga okan sang rsi, Déwi Anjani, Sugriwa, lan Subali raris katitah nglebur dosa nangun tapa santukan sampun lémpas saking sesana.

Dalang Nyoman Sukarta nganggén carita punika pratiwimba tekén siswa SMPN 2 Marga. Sapasira nakal, lémpas ring aturan sekolah jagi keni hukuman. “Ngiring ngawit mangkin setata melaksana nganutin Tri Kaya Parisudha, pamekas alit-alit makasami sampunang nglawan titah guru napi malih melanggar tata tertib sekolah,” teges Sukarta. Ki Sanak