Satya Ngancan Kasumbung, Jun Bintang Pacang Duét Malih Sareng Tika Pagraky

Jun Bintang magendingan sareng Tika Pagraky.

DÉNPASAR, ISIN-GUMI

Jun Bintang sing madaya gending Satya sané kagendingang sareng Tika Pagraky ngancan kasumbung tur kamiletin olih kramané ring Bali. Sané makada Jun Bintang pinaka pangripta tembangé punika garjita ring manah santukan saking anaké alit kantos panglisiré oneng tur bisa ngendingang tembangé punika.

Bagia sané karasayang olih Jun Bintang ngancan matumpuk-tumpuk santukan akéh kramané sané meneng ring Bali utawi jenek ring dura Bali muduhin gending Satya-né punika. Wénten sané ngover (ngendingang sabisan nyané tur kabuatin vidio) tur ngirimang ka instragram @jun bintang muah instagram @tika. “Vidio sane kaputer ring youtube katonton olih akéh krama. Pinaka pangripta gendingé puniki titiang garjita ring manah,” ucap Jun Bintang.    

Jun Bintang narka, kramané oneng ring tembangé punika santukan gendinganné polos. Punika taler video sané kakaryanin olih Gus Windi saking Jibolba Biker Video nganutin aab jagaté sakadi mangkin. Untengné sané karasayang olih para yowanané. “Rikala titiang matembang sareng Bintang Band utawi padidianan, akéh sané ngarsayang tembangé puniki. Dumadak Satya ngancan kasenening olih semetoné sami,” pangarep Jun Bintang.

Jun Bintang taler mikamkamin malih magendingan sareng Tika Pagraky. Ipun ngangkenin sampun maduwé reriptan malih, nanging kantun kasilibang. Tembangé anyaré punika jagi gelis karekam sareng Tika Pagraky. “Titiang kantun satya nyantosang Tika Pagraky budal saking Jakarta,” ucap Jun sané oneng malila cita nglindeng negakin montor tua punika. Manut Jun Bintang, Tika Pagraky kantun ring Jakarta muputang proyék Déwi-Déwi Mahadéwi. Ki Sanak