Bendésa Abiantuwung ’Ngontrakang’ Tanah Pelaba Pura Anggon Kalangan Tajen

Kalangan tajen ring Desa Abiantuwung, Kecamatan Kediri, Tabanan.

TABANAN, ISIN-GUMI

Bendésa Adat Abiantuwung, Kecamatan Kediri, Tabanan, Ida Bagus Sutéja, kadalih nyéwaang tanah pelaba Pura Dalem tekéning bebotoh tajen. Tanah pelaba Pura Dalem sané magenah dauh kantor LPD Abiantuwung punika kaséwaang Rp 10 yuta atiban. Krama Abiantuwung pakrimik santukan Bendésa Adat Ida Bagus Sutéja ngontrakang tanah pelaba Pura Dalem punika nénten kadulurin paparuman adat.

Manut sinalih tunggil krama Abiantuwung, Ketut Semadha Putra, tanah pelaba Pura Dalem punika kakontrakang tekén bebotoh tajen duk Maret 2016 lintang. Ipun miragi orti tanah pelaba pura punika kakontrakang Rp 10 yuta atiban. Semadha Putra ngaku kuciwa santukan tanahé punika kaanggén kalangan tajen. Pecak (Purnawirawan) TNI AL puniki taler kuciwa santukan polisi sakadi tan rungu indik tajen ring Désa Abiantuwung. “Dumun tanahé punika kaarsayang olih kramané anggén ngwangun kantor Perbekel Désa Abiantuwung, nanging Bendésa Ida Bagus Sutéja nénten cumpu. Nguda anggén kalangan tajen ida cumpu?” pitakén Semadha Putra.

Bendésa Adat Abiantuwung, Ida Bagus Sutéja nerangang nénten wenten ngontrakang tanah pelaba Pura punika anggén kalangan tajen. Nanging sinalih tunggil krama kayun nganggén tur nyadia ngaturang punia Rp 10 yuta atiban. “Wénten anak maturan, tanah pelaba punika durung kagunayang nika mawinan kaselang olih krama tur nyadia maturan punia Rp 10 yuta atiban,” ucap Ida Bagus Sutéja sakadi kacungkil saking Harian Umum NusaBali, Kamis (Wraspati tanggal 23/6).

Ida Bagus Sutéja negesang, nénten uning genahé punika anggéna napi. “Prajuru nénten nyarengin derika,” saur ida. Yéning wénten buut utawi masalah, nénten kapica malih nyelang genahé punika. Ki Sanak