 |
| Ketut Lastri kacingakin kampih di Pasih Pengalon, Désa Antita, Manggis, Karangasem, Sukra (3/6). Foto saking facebook. |
AMLAPURA, ISIN-GUMI
Ketut Lastri, 24, krama Banjar Cemulik, Désa Bunga Mekar, Kecamatan Nusa
Penida, Klungkung kampih di pasih Pengalon, Désa Antiga, Kecamatan Manggis,
Karangasem, Sukra (3/6). Sadurungné, Ketut Lastri lan Kadék Indah Bérliana, 8,
kedeng ombak lan ilang di pasih Anjel Bilabong, Banjar Sompang, Désa Bunga
Mekar, Kecamatan Nusa Penida, Wraspati (2/6) sanja. Nanging Ketut Lastri
kapanggihin sampun mati. Sawalikné, Kadék Indah Bérliana kantos mangkin durung
kapanggihin. Napiké anak alit punika kantun maurip utawi mati.
Lastri sané kapinggihin kampih di Pasih Pengalon lantur ka bakta ka RSUD
Klungkung nganggén mobil Badan Penanggulangan Bencana Daérah (BPBD) Klungkung.
Uwakné Ketut Lastri, Madé Mudra, 55, mastikayang anak istri tan maurip kampih di
Pasih Pengalon wantah keponakanné. Cecirénné di tundun tangébot misi tato
matulisan Suwéden lan Suwéndri. “Niki ponakan titiangé, cecirénné tato puniki.
Suwéden punika aran bapanné, Suwéndri aran méméné,” ucap Mudra nerangang
kacungkil saking MetroBali.com.
Sadurungné, kalih diri anak istri kedeng ombak di Pasih Huug Angel Bilabong,
Banjar Sompang, Désa Bunga Mekar, Kecamatan Nusa Penida, Kabupatén Klungkung,
Wraspati (2/6) sanja. Kalih diri krama kedeng ombak punika mapeséngan Ni Ketut
Lastri, 24, lan Ni Kadék Indah Bérliana, 8, sami-sami saking Banjar Cemulik,
Désa Bunga Mekar, Nusa Penida. Kantos Sukra (3/6) mangkin, kalih diri krama
punika durung kapanggihin.
Manut orti, kakalih diri krama kedeng ombak punika malali ka Pasih Angel
Bilabong ajaka lalima. Katiga krama siosan inggih punika Ni Putu Adi Saraswati,
16, Ni Luh Novia Déwi, 21, lan Bridé Wiliam, 40. Toris Australia punika wantah
kurenané Ketut Lastri ané kedeng ombak. Daweg punika, kalimang diri krama
Banjar Cemulik puniki malali nyingakin kolam alami (Angel Bilabong) sane wénten
ring pasisi Huug. Rikala pacing majalan mulih, nadak sara teka ombak gedé.
Makalima diri krama punika gulung ombak. Nanging Bridé Wiliam, Putu Adi
Saraswati, lan Novia Déwi nyidang nylametang raga.
Makatiga krama sané selamet puniki ngemasin beréd. Ipun makatiga raris
ngalih-ngalihin Ketut Lastri lan Kadék Indah, nanging tan kapanggihin. Santukan
sampun peteng, petugas kepolisian kawantu angga Badan Penanggulangan Bencana
Daérah Kabupatén Klungkung nénten nglanturang ngalihin petengé ento. Nanging
Sukra (3/6) semeng, petugas nglanturang ngrerehin Ketut Lastri lan Kadék Indah.
Ki Sanak
Tidak ada komentar:
Posting Komentar