Krama Desa Pakraman Semaja, Desa Bengkel Sari, Kecamatan Selemadeg Barat, Tabanan ngempetin jalan ka pabrik aspal druwen PT Dayu, Buda Kliwon Ugu (25/5). Pabrik aspal punika kaempetin kerana ngawinang wewidangan desa pakraman cemer. Santukan PT Dayu ngutang lad oli ka Telabah Kelecung ane yehne membah ka pasih Tireman. Krama taler nguyutang abune masepuk kantos krama keweh maangkihan.
Manut Bendesa Adat Semaja I Nengah Suardana Yasa, PT Dayu ngawitin makarya warsa 1998. Nanging kantos mangkin tan maduwe tongos ngentungang limbah. Nika mawinan lad oli kaentungang ka telabah Kelecung sane ngranayang yeh telabe cemer. Keto mase yeh pasih Tireman macampuh oli kerana yeh telabahe di ulu pasihe. Krama ingkup ngempetin jalan ka pabrik aji pecak drim apang pabrike tusing nyidang magae lan katutup. "Krama taler nguyutang ebuke masepuk," ucap Suardanayasa.
Suardana ngawewehin, PT Dayu lan Desa Adat Semaja wenten perjanjian kontrak kerjasama kantos bulan Juli 2015. Santukan PT Dayu kantun wenten pakaryan utawi proyek aspal ring wewidangan Kecamatan Selemadeg Barat, desa adat micayang perpanjangan kontrak kantos Desember 2015. Yening kontrak puput apang pabrik katutup. Nanging disubabe kontrak telas, PT Dayu tan nglapor ka Desa Pakraman Semaja. Maimbuh saking bulan Januari kantos April 2016 kantun wenten penimbunan material di pabrik.
Duk tanggal 14 April 2016, Desa Adat Semaja ngirim surat ke PT Dayu. Kantos mangkin surat punika durung kawales olih PT Dayu. Nglimbak orti yening pabrik pacang makarya aspal malih. Krama raris mutusang nyuudang lan ngempetin margi ka pabrik.
Bendesa Suardana ngawewehin, Sekkab Tabanan ngrincikang patemon sareng PT Dayu lan krama, Sukra (27/5). Sadurung krama ngempetin margi ka pabrik nganggen drim, angga Polres Tabanan dumunun tedun police line santukan pabrik aspal PT Dayu nganggen batubara, sepatune nganggen solar. Kaceritayang, PT Dayu mapunia Rp 10 yuta ka desa adat duk warsa 2012. Ring warsa 2014, nincap dados Rp 25 yuta. "Krama nunas pabrike katutup yadiastun wenten punia santukan krama nenten ngarsayang palemahanne cemer," teges Suardana.
Direktur PT Dayu, I Made Puniarta dugas katekenin masarana telepon ngaku wenten ring dura kota. Dane nyanbatang nenten wenten wicara sareng Desa Pakraman Semaja. "Sami mamargi becik. Malih kalih rahina (Sukra 27 Mei) jagi kacunduk sareng krama," cawis Puniarta. Ki Sanak
Tidak ada komentar:
Posting Komentar