TABANAN, ISIN-GUMI Krama Banjar Semaja lan Bonian, Désa Pakraman Semaja, Kecamatan Selemadeg Barat, Tabanan ingkup nyuudang pabrik aspal di wewidanganné. Pamutus punika kaambil duk rapat mediasi krama Désa Pakraman Semaja sareng owner PT DAYU, Madé Puniarta kapimpin olih Sekretaris Kabupatén Tabanan Nyoman Wirna Ariwangsa di Balai Banjar Semaja, Sukra Paing Ugu (27/5).
Kala patemon punika, Sekkab Wirna Ariwangsa lan Madé Puniarta nunas ring krma mangda kapicayang memperpanjang kontrak. Krama Banjar Bonian polih nagingin pinunas Sekkab lan PT DAYU. Nanging krama Banjar Semaja tetep kukuh nulak. Mapan pabrik aspal punika magenah ring wewidangan Banjar Pakraman Semaja, krama Banjar Bonian nuutin krama Banjar Semaja nulak pabriké punika. “Pokokné pabrik puniki katutup,” ucap Bendésa Adat Semaja, Nengah Suardana Yasa. Sekkab Tabanan Wirna Ariwangsa nuturang, nunas ring krama mangda micayang memperpanjang kontrak santukan PT DAYU kantun wénten pakaryan menahin margi. Kerana katulak, ipun tan prasida nunasang malih. Sawalikné, sané nuénang PT DAYU, Puniarta nunas apang kapica kantos Oktober 2016. Yéning kapica ipun nyadia nuutang pinunas krama.
Nanging krama tetep kukuh, nulak kerana sampun ping péndo uluk-uluka ajak PT DAYU. Krama nulak yadiastun polih batu-batu Rp 25 yuta kerana milih seger oger. Pabrik aspal ngranaang udarané cemer. Maimbuh pabrik ngutang lad oli ka tukad Klecung sané membah ka pasih Tireman. Ki Sanak
Tidak ada komentar:
Posting Komentar