TABANAN, ISIN-GUMI
Angga Polrés Tabanan ngejuk anak
mamitra di sinalih tunggil pondok wisata wewidangan Banjar Subamia Kélong, Désa
Subamia, Kecamatan/Kabupatén Tabanan duk Wraspati Wagé Bala (19/5). Boya ja
buin makoncréngan I Made Sub, 44, lan Ari, 43, kajuk, nanging sangkaning ipun
makalih nyabu bareng. Daweg kagerebek dugas makoncréngan di pondok wisata,
polisi makatang shabu mabat 0,31 gram. Ipun makalalih raris kacelepang ka
tahanan Mapolrés Tabanan.
“Ipun makakalih nénten ja nganggon kémanten, nanging taler nyimpen shabu-shabu,” ucap Wakil Kepala Polrés Tabanan Kompol Léo Martin Pasaribu, Anggara Wagé Ugu (24/5). Disubané katuréksain, Sub saking Banjar Dauh Pangkung, Désa Tista, Kecamatan Kerambitan, Tabanan lan Ari saking Perum Graha Candra Asri Blok I/10, Désa Meliling, Kecamatan Kerambitan, Tabanan ngaku nyepel sabhu tur kaengkebang di tetamanan pondok wisata.
Polisi lantas ka pondok wisata punika tur manggihin 7 pakét shabu mabat 2,11 gram. Tiosan tekén shabu, polisi taler ngamanang bong utawi penyedotan shabu. Ipun makakalih ngaku maan shabu uling kantinné saking Dénpasar. Nanging Sub lan Ari ngaku tusing nawang adan timpalné ané ngemaang shabu. Ipun makakalih kakeniang pasal 112 ayat 1 Undang-Undang Nomor 35 Tahun 2008 indik narkoba mapenjara paling bedik 5 tiban lan paling makelo 20 tiban. Indik danda, paling bedik kena Rp 800 yuta, paling liu Rp 8 miliar. Ki Sanak
Tidak ada komentar:
Posting Komentar