Magarangin Parkir, Sopir Tusuk Sopir

TABANAN, ISIN-GUMI

Sopir minibus Elf I Gusti Ngurah Ariana majugjag ajak sopir bus Merpati Gusti Ngurah Adi Putra, 56, di tongos parkir Daya Tarik Wisata (DTW) Tanah Lot, Désa Beraban, Kecamatan Kediri, Tabanan, Sukra Kliwon Bala (20/5). Ngurah Ariana ané brangti nyemak temutik lantas nusuk bangsané Ngurah Adi Putra. Bangsané Ngurah Ariana matatu, dalemné sawatara 3 céntimetér. Ngurah Adi Putra lantas kaubadin ka BRSUD Tabanan, Ngurah Ariana kaserahang ka kantor Polsék Kediri.

Manut orti, kakalih sopir puniki mauyutan di parkir DTW Tanah Lot sawatara galah 17.00 Wita. Satondén ento, Ngurah Adi Putra, sopir saking Banjar Cebaang, Désa Serongga, Kecamatan/Kabupatén Gianyar teka ka parkir ngaba bus Merpati. Lantas ngalih tongos parkir bus. Nanging di tongos ané kaucukang tongos parkir bus ento, ada mobil minibus Elf ané parkira tekén Ngurah Ariana. Sangkaning rahayu, Ngurah Adi Putra nundén Ngurah Ariana ngisidang mobilné. “Ipun pedih lan mamisuh. Munyinné kasar,” ucap Ngurah Adi Putra di BRSUD Tabanan.

Kadena magedi dugas Ngurah Ariana ngagah jelanan mobilné, nanging pesu ngaba temutik. Tan pasatua Ngurah Ariana lantas nusuk basangné Ngurah Adi Putra. Ngurah Adi Putra bah ka tanahé. Getihné nyrékcék uling basangné ané matatu. Limané tangébot masé matatu. Adi Putra ngengsehang bangun lantas mlaib nylametang raga ngojog Pos Satpam. Ngurah Ariana maan ngepungin nanging Adi Putra suba kasalemetang olih Satpam. Sawalikné Satpam lantas ngejuk lan nyerahang Ngurah Ariana ka Polsék Kediri.

Ngurah Adi Putra ané matatu maan plaibanga ka Klinik Hotél Pan Pasific, tongosné sawatara duang kilométer uling parkir DTW Tanah Lot. Ulian tatuné dalem, Ngurah Adi Putra lantas karujuk ka BRSUD Tabanan. Kapolsék Kediri Kompol Putu Suprama dugas katelépon matutang buut sopir di Tanah Lot. “Jani enu ngidih keterangan. Ipun ajak dadua mayegan ngarangin parkir,” ucap Kompol Putu Suprama. Ki Sanak