Inguh, ’Kaptén’ Mati Ngentungang Raga di Abing Sedalem 10 Méter

Potrékan kapica saking angga Polsék Penebel

TABANAN, ISIN-GUMI

“Pa, buin jah tiang kal mati,” kruna punika ucapanga ping tiga olih I Wayan Putra Wismaya, 38, tekén bapané, I Wayan Sunétra, 60. Suud ngomong kéto, Putra Wismaya sané biasa kakaukin Kaptén mlaibang ngajanang. Bapanné ngepungin, nanging tusing nyidang nugtugin. Neked di abing dajan Pura Puseh Désa Pakraman Piling, Mengesta, Kecamatan Penebel, Tabanan, Kaptén ngentungang raga ka abingé sedalem 10 méter. Kaptén mati, sirahné belah ngaplag punyan kayu.

“Sebet pesan keneh tiangé, plaibné becat titiang tusing nyidang ngepungin. Pianak tiangé mati ngentungang raga,” ucap Sunétra di jumahné, Banjar Piling Kawan, Désa Mengesta, Kecamatan Penebel, Tabanan, Sukra Kliwon Bala (20/5). Sunétra nuturang, satondén lacur, pianakné sané mula ngraksa sakit inguh (buduh) teka uling tegalanné ngalih sèla lakar keripik. “Sawatara jam dua nglingsiran, dugas neked jumah ipun ping telu maan masesambatan pacang mati,” imbuh Sunétra sigsigan. Sunétra nuturang, pianakné dugas ipidan biasa sakadi timpaln-timpalné. Nanging ngenjek teruna, Kaptén ngraksa sakit inguh. Uling cerik, Kaptén ubuh mémé.

Kelian Adat Banjar Piling Kawan I Komang Édi Putra Arsawan nuturang maan ngajakin Kaptén maubad ka Rumah Sakit Jiwa (RSJ) Provinsi Bali di Kabupatén Bangli. Nanging bapanné némbahang. Édi ngajakin maubad kerana Kaptén terus nyambatang nagih mati, ngaplagang sirahné di punyan kayu muang batu. Kéto masih demen kraik-kraik nyambatang nagih mati. “Bapanné keras ati némbahang kramané mapitulung ngubadin pianakné ka Bangli,” ucap Édi Putra. Kaptén pacang kailidang di sétra Désa Pakraman Piling ring dina Soma Pon Ugu (23/5).

Kapolsék Penebel AKP Wayan Dastra matutang Kaptén ngemasin lacur sangkaning ngulah pati ngentungang raga di abingé sedalem 10 méter. Kaptén kamulan ngraksa sakit inguh tur katarka sakitné kumat. “Disubané katingtingang uling abingé lantas ka aba mulihné. Ipun ngulah pati sangkaning sakit iguh,” teges AKP Dastra. Ki Sanak