Magarangin Céwék Kafé, Rudianto Macakcak

Ilustrasi druwén Témpo.co

NEGARA, ISIN-GUMI

Rudianto, 25, teruna uling Banjar/Désa Yéh Sumbul, Kecamatan Mendoyo, Jembrana kakeroyok olih petang diri teruna di kafé wewidangan Désa Delod Berawah, Kecamatan Mendoyo, Jembrana, Soma (23/5) ngedas lemahé. Sinalih tunggil pangroyok, Ikbal Sirri, 28, suba juk polisi. Majaguran di kafé majalaran ngarangén céwék kafé ané maadan Anita Agustin utawi Tata.

Rudianto luas ka kafé di Delod Berawah padidianan. Ditu ia lantas katimpalin olih Tata, 26, luéng uling Jawa Timur. Suud nglonggong minuman, sawatara jam 02.30 Wita, Rudianto lan Tata ngigel ka kalanganné. Dugas ento, ané ngurusang kafé ngontak gendingan DJ. Dugas Rudianto lan Tata kecag kecog nuutang musik, petang diri teruna lénan katimpalin céwék kafé masé majogédan. Dugas ento, sinalih tunggil terunané ngencanin Tata lan ngajakin majogédan. Rudianto nombahang, terunané salah tampi.

Sinalih tunggil terunané lantas ngedeng baong bajuné Rudianto. Buin telung diri terunané lantas ngagurin lan ninjakin. Rudianto cuah-cuah pesu getih. Muanné anggona samsak tekén petang diri terunané. Céwék kafé lan satpamé lantas melasang. Petang diri teruna ané nyakcakin lantas magedi. Rudianto nglapor ka kantor Polsék Mendoyo. Tusing makeloné, polisi ngejuk Ikbal Sirri jumahné Jalan Salak Lingkungan Pertukangan, Kelurahan Loloan Barat, Jembrana.

Kanit Réskrim Polsék Mendoyo AKP Gusti Komang Muliadnyana matutang ada biuta di kafé. Dané nyambatang, buin telung diri teruna ané milu ngeroyok suba kaburu. “Adan lan umahné suba tawang. Jani petugas enu ngepungin,” ucap AKP Muliadnyana. Ki Sanak