Murid SD Ngemasin Lacur Cegut Legu Poléng

Ngurah Narendra polih matamba ka bidan muang dokter
 kulawarga sadurung baktana ka BRSUD Tabanan

            TABANAN, ISIN-GUMI

Murid kelas I SD Immaculata Tabanan, Anak Agung Ngurah Jaya Narendradingrat, 7, ngemasin lacur (mati) kerana kena demam berdarah (DB), Redité Paing Ugu (22/5). Ngurah Naréndra lacur dugas maan perawatan di BRSUD Tabanan sawatara jam 00.00 Wita. Ipun pacang kaabénang ring dina Wrespasti Umanis Ugu (26/5) sané jagi rauh.

Manut yayah renané, Anak Agung Manik lan Sagung Alit Srinur Dewi, Ngurah Naréndra sampun sungkan panas duk Anggara Paing Bala (17/5). Ngurah Naréndra raris kaajak maubad ring bidan tah joh saking ipuné jenek, Banjar Jagasatru, Désa/Kecamatan Kediri, Tabanan. Bidan micayang tamba lan nundén cék darah yéning malih tigang rahina panesné nénten tuun. Malih kalih rahinané, Wrespati Wagé Ugu (19/5), Ngurah Naréndra kaajak maubad ring dokter kulawarga. “Daweg punika panesné sampun tuun. Cék darah, trombosit normal 195,” tutur Ngurah Manik ring jeroné.

Nanging ring dina Saniscara Umanis Bala mengpeng purnama, sawatara jam 16.00 Wita, Ngurah Naréndra polih ngluah. Ibuné, Sagung Alit Srinur Déwi raris ngajak Ngurah Naréndra maubad ka BRSUD Tabanan. Risampun kacék olih dokter, Ngurah Naréndra kadadosang budal. Daweg punika, dokter nénten ngmargiang cék darah malih. “Dokter mapaica tamba mual,” ucap Ngurah Manik.

Budal saking BRSUD Tabanan, Ngurah Naréndra malih seneb-seneb maimbuh ngluahang getih. Ibuné malih mlaibang Ngurah Naréndra ka BRSUD Tabanan sawatara jam 22.00 Wita. Risampun obsérvasi lan cék darah, trombosit 60. “Kala punika titiang sampun paling. Nanging kantun wénten arsa santukan denyut nadiné kantun becik,” Ngurah Manik nuturang. Nanging ngancan peteng, ngancan nyelékang, sawatara jam 00.00 Wita, Ngurah Naréndra tan prasida kasalemetang.

Ngurah Manik, wartawan Bisnis Bali puniki ngaku kuciwa ring dokter BRSUD Tabanan. Santukan rikala matamba galah 16.00 Wita, Ngurah Naréndra kadadosang budal. Raris tan prasida katulungin risampun malih kumat. “Pantesné daweg soré punika, pianak titiangé tak kadadosang budal,” teges Ngurah Manik. Direktur BRSUD Tabanan dr Nyoman Suratmika matutang Ngurah Naréndra ngemasin lacur sangkaning DB saking cegutan legu poléng utawi Aédés Aégypti. “Ipun keni Dengue Shock Syndrom,” ucap dr Susila.

Indik Ngurah Naréndra ngemasin lacur sangkaning cegutan legu poléng, BRSUD Tabanan pacang ngelarang audit. Audit punika wantah prosedur sané patut kamargiang yéning wénten krama ngemasin lacur sangkaning DB. “Ring audit punika jagi nunas tetimbang saking ahli,” tegas dr Susila. Ki Sanak