Sasukat dadi
perbekel, Kadék Anto setata ngenehang apang désané kasumbung di kecamatan,
kabupatén, kantos di panegara Indonésia. Ento ané ngranaang ipun setata ngédéngang
potrékan lan nyobyahang pagaénné di media sosial; facebook, instagram, youtube, muang whatsapp. Ulian ento ipun kaucap perbekel milenial olih timpal-timpalné. Ané tusing demen tekéning déwékné
nyambatang ipun perbekel narsis. Jelé
melah omongan kramané katampénin
biasa-biasa dogén.
Kadék Anto taén
nyambatang dana désa mula gedé tuun ka désa. Nanging yén pah-pahang nganutin
posnyané, tusing makejang program
bisa kalaksanayang. Cara sesenggaké, nyaluk kamen gantut. Ento ané ngranayang
ipun setata mautsaha ngrebut dana saking pusat, provinsi, kantos kabupatén
apang nyidang ngwangun désa. Asung Ida Sesuhunan mapica, mara limang bulan
ngayah di désa ipun nyidang ngrebut dana pusat anggon mecikang saluran irigasi muang jalan produksi pertanian. Telabah lan pundukan
cariké kalinggahang tur kabeton. Ané ngranayang ipun liang kerana krama cacakan
carik cumpu ajak mecikang telabah lan pundukanné. Buina krama cacakan cariké
tulus nyerahang tanahné tan panagih pangentug utawi ganti rugi. Tatujonné apang nyidang ngaba montor lan élahan ngaba
traktor ka cariké.
Dugas nyambatang
upah kegiatan padat karya, ramé cara
nyawan ababin kramané nyautin. Upah saking pemerintah ané serahang tekén
pangayah Rp 85 tali awai lan tukang Rp 100 tali awai. Tatujon pemerintahé pipis
uling pusat apang karasayang olih krama di tongos ada proyéké. Tusing dadi
ngalih buruh uling désa lén. Utamayang krama tuara utawi keluarga kurang mampu apang maan pagaén tur ékonominé sida katincapang. Nanging krama cacakan carik tusing
nerima yéning maan upah amonto. Boya ja nulak program pemerintah. “Adanan tiang
maburuh di tongos lénan bandingang maan upah ulung dasa lima tali awai.
Napimalih tiang suba maan gaé di tongos lén,” ucap sinalih tunggil krama
cacakan carik dugas kapupulang olih Perbekel Kadék Anto di balai subak.
Tangkejut Kadék
Anto ningehang. Makrebetan kenehné kerana krama cacakan cariké nulak upah saking
pemerintah. Upah katulak sinah kegiatan
pusat tusing bakat. Yén penékang upahné dija jemakang pipis? Yén upahin Rp 85
tali nganutin uger-uger pemerintah abedik, pastika katulak. Yén rasayang upah kegiatan padat karya tunai di Bali
tusing ngenén. Sawiréh buruh di Bali suba biasa maan gajih gedé yadiastun dadi
buruh nandur di cariké. Upah nandur Rp 14 tali awai, yén nandur 8 are suba maan
Rp 102 tali. Apabuin maburuh umah, pangayah maan Rp 125 tali awai. Ngancan
makrebatan sirah perbekelé jejeh pocol nguberin dana pusat. Ipun ngrestiti ring
Ida Bhatara Bhagawan Panyarikan sané malingga di Pura Bedugul.
Syur, angin
petengé nelusup ka awakné. Sarasa ngemaang pajalan apang sida antar wicarané.
Ipun lantas ngidih tulung tekén krama cacakan cariké apang sareng-sareng ngayah
muputang proyéké. “Yén ngayah titiang cumpu. Yén maburuh titiang nulak!” pasaur
krama cacakan cariké. “Tiang nénten purun nulak program pemerintah pusat.
Titiang nyadia nyerahang tanah nénten nunas ganti rugi, nika bukti titiang
cumpu tekéning program pemerintah. Niki boya nguyutang jinah, nanging rasa
ngelahang. Napi ja program dané perbekel, titiang ngiringang. Ngudiang titiang
nulak gaénang melah!” teges krama cacakan carik ané lianan.
Demen pisan perbekelé
ningehang pasaut krama cacakan cariké. Kasujatianné sami nyadia ngayah, nénten
nguyutang upah. “Wantah suksama katur ring ida dané krama cacakan carik
makasami. Kamer titiang iwau mirengang, titiang narka program puniki katulak.
Aksamaang titiang pangayah désa wimuda kalintang tambet. Inggih, ngiring
sareng-sareng ngayah mangda pamargin kegiatan
antar. Rp 85 tali awai lan Rp 100 tali awai nika ja boya upah, nanging samatra
anggén numbas toya lan jaja. Punapi cumpu?” pitakén perbekelé.
“Nggih. Titiang
ngiring!” mabriuk krama cacakan cariké nyaurin.
Disubané suud parum, ngénggalang perbekelé
nelépon tim pusat, nyambatang krama nerima kegiatan
padat karya tunai lan nyadia nyerahang tanahné tan panagih ganti rugi. Tusing makeloné proyéké
majalan. Satondén ngayah, perbekelé ngemaang arah-arah. Dugas ento sinalih
tunggil krama cacakan carik nakonang tekén pekasehé, ngudiang program pusat
tuun di subaké ditu. Nguda tusing di subak ané lénan, apabuin di désa ada
petang subak. Pekasehé nerangang, program pusat punika wantah sangkaning survéi, katelisikin olih tim saking
pusat kadampingin tim provinsi. Sami wewidangan cariké di désa muang di dura
désa katelisikin. Lemah peteng tim mamargi ngrereh genah sané becik lan adung
tekéning program pemerintah pusat. Pamuputné subak Waringin Sungsang kapilih.
Ri sampun
proyéké mamargi, akéh wénten petugas nuréksain. Sané ngranaang tangkejut,
Paspamprés taler tedun. Digelis perbekelé nyagjagin tur nakenang indik
sapangrauh Paspamprésé. “Pak Présidén
akan meninjau kegiatan padat karya tunai di désa ini. (Pak Présidén pacang
lunga nyingakin pamargin kegiatan padat karya tunai ring désa deriki),” saur
Paspamprésé.
Srieng, majujuk
bulun liman lan baong perbekelé ningehang pasaut Paspamprésé. Sekenké Présidén
Jokowi pacang macecingak ka désané. Sarasa ngipi, apabuin désané cenik, tusing
ada ané sandang kaandelang. Yén tingalin di tivi-tiviné, Présidén Jokowi
kamulan seneng blusukan utawi
macecingak ka désa-désa. Yéning seken Présidén Jokowi tedun ka désa, sinah
pacang kaliput wartawan, ortiné pacang nglimbak ka dura désa, ka dura kabupatén,
kantos sajebag provinsi di Indonésia. Yéning saja Presidén Jokowi tedun ka
désa, sinah kulawarga ané transmigrasi di Sumatera pacang nawang lan bangga
nepukin pianakné masanding mapotrék ajak Présidén Jokowi. Sarasa ngipi
karasayang. Nanging ipun inget pabesen Presidén Soekarno, ‘bermimpilah yang tinggi, kelak akan jatuh di antara bintang-bintang’.
Paspamprés iteh
nuréksain tongos proyéké. Jalan beton katuréksain, punyan kayu katuréksain,
kanti dampar tiing ané ada di tengah cariké kaperiksa. Bengong Kadék Anto
ningalin pagaén Paspamprésé. Di Bali aman pak, kéto atur perbekelé tekéning
Paspamprésé. Ipun negesang di désané aman, tusing taén ada maling, tan sandang
sangsayain. Kapastiang sapangrauh présidén nénten polih kapiambeng.
“Ini protap pak,” saur Paspamprésé
sinambi iteh nuréksain genahé.
Perbekelé tan
bani mabaos malih, sajaba nunas ica ring Ida Sesuhunan dumogi Presidén Jokowi,
junjungan panjak Indonésiané sida macecingak ka désané. Tusing karasa suba
sanja. Krama cacakan carik suba suud ngayah. Sakabesik mulih ka pondoknyané
soang-soang. Paspamprés nugtugang nuréksain tongosé. Perbekel lan pekaseh, kéto
masih petugas penyuluh lapangan (PPL) kantun sayaga di cariké, ngantosang
Paspamprésé muputang pakaryané. Kantos saru mua, pakaryané durung puput. Ento
ngranayang perbekel, pekaseh, lan PPL mapamit saking genah kegiatan padat karya tunai.
Petengné,
perbekel, pekaseh, lan PPL buin ka tongos kegiatan
padat karya tunai. Petengé ento Paspamprés enu magaé nyujukang toilet temporary. Suud nyujukang tongos
mawarih, Paspamprésé mulih. Perbekelé nyagjagin tur nakonin.
“Pak Presidén positif besok ke sini. Hanya
sepuluh menit. (Pak Presidén pastika lunga meriki. Polih galah dasa menit),”
pasaur Paspamprésé.
Liang pisan
perbekel, pekaseh, lan PPL ningehang pasaut petugas pengaman presidénné.
Makejang sarasa mangipi lakar katemu lan masalaman ajak Présidén Jokowi. Kanti
peteng perbekel, pekaseh, lan PPL nongosin toilet
temporary présidénné. Tenget pisan tongos mawarih présidénné. Suud kapasang
lantas kagembok. Kotak mawarna tangi ento di tengahné misi AC. Sinah melah di
tengahné. Marasa dadi wong désa, kayang tongos ngéngék presidén bakat tongosin
kanti ka peteng. Jeg liang kenehé mara maan gatra presidén lakar ka désa. Kanti
sing makita mulih, adanan nongosin proyék apang sing kasépan nyangga Présidén
Jokowi sané kasumbung merakyat.
Paseliwer anak
tawah-tawah tepukin petengé ento. Yadiastun namping sétra, tusing ja ngelah
rasa jejeh. Sawiréh percaya ané seliwah boya ja sasiluman nanging manusa jati.
Tawah kerana tusing cara wong désa apabuin krama désa padidi. Ada ngaba
pancing, nanging di bangkiangné nyelet bedil. Ada ngaba tambah nyaruang luas ka
cariké nanging sledétné cara lubak nengéngin siap. Mirib intél ané teka, katugasin
nyaga tongosé apang aman. Ada dadiné ajak magadang di cariké. Apa kadén ané
ngranaang, perbekel, pekaseh, lan PPL tusing ngelah keneh mulih yadiastun suba
tengahing dalu. Ortané saling timbal ngranaang kiapé ilang. Petengé ento sarasa
lén angin cariké, ngranaang bayuné seger oger. Makejang nongos ditu apang
tusing kasépan nyanggra Présidén Jokowi.
Ngancan peteng,
ngancan ngliunang anaké teka. Ané mamancing lan ngaba tambah tunian magedi,
kagantinin petugas ané lénan. Ngancan precaya perbekel, pekaseh, muang PPL
indik presidén pacang lunga macecingak ka désa. Yéning maboya, sinah petugas
intélé tusing ja tuyuh cara panerikan glindang-glindeng ka désa. Mirib
Paspamprésé tusing ngaénang toilet
temporary di tongos kegiatan padat
karya tunai yéning murdaning jagat Indonésia nénten lunga ka désa. Sagétan
petugas paspamprésé di samping perbekel, pekaseh, lan PPLé ngorta. Petugas
Paspamprésé bisa ngomong Bali. Nakonang ngudiang perbekel, pekaseh, lan PPLé
tusing mulih, kanti tengahing dalu magadang di cariké, buina tusing ada pantes
ané pagadangin.
“Titiang ten
makeneh sirep, jejeh leplep sirep maimbuh tuah ngipiang Jokowi!” saut perbekelé.
Kukuh, 19 April
2018
Tidak ada komentar:
Posting Komentar