 |
Trek nyungkling di Banjar Dauh Pala, Desa Dauh Peken, Tabanan. |
TABANAN, ISIN-GUMI
Trek Fuso B 9130 PM nyungkling di dangin kreteg Yéh Nu, Banjar Dauh
Pala, Désa Dauh Peken, Kecamatan/Kabupatén Tabanan, Sukra (29/9) semeng. Trek
ngaba sampi ento nyungkling katarka ulian sopirné, Muhamad Nurahman, 34, kiap
rikala nyetir. Sopir, pangangon sampi, lan muatan sampiné makejang selamet,
nanging sampiné sambrag nongklang nylametang raga.
Trek ngaba sampi ento nyungkling sawatara jam 03.00 Wira. Satondén
nyungkling, trek ento teka uling kangin (Dénpasar) lakar ka Gilimanuk. Neked di
péngkolan ka tengawan di alas Pesiapan, uling kauh teka trek ngliwatin as
jalan. Sopir ‘sampi’ tengkejut lantas ngipekang setir ka tengébot das nabrak
umah krama. Sopir ‘sampi’ lantas ngipekang setir ka tengawan. Lacur, pajalan treké
nyrégség ngemasin nyungkling.
 |
| Sampi kategulang di alas Pesiapan. |
Ri kala treké nyungkling, sampiné sambrag nongklang ka bet-beté kerana
tali panegeluné pegat di treké. Sampiné masih liu nglindeng di tengah jalané.
Sopir trek lan pangangon sampi, Hérman Budi, 30, uling Kalipuro, Banyuwangi
lantas ngejuk sampiné tur kategulang di punyan kayuné di alas Pesiapan. Manut Hérman
Budi, ipun nyemak sampi 33 ukud di Kecamatan Manggis Karangasem. Sampi-sampi
ento gelah krama ané madunungan. Sampi-sampiné ento adepa tekén krama
madunungan pacang ka kirim ka Sumatera.
Manggala Satlantas Polrés Tabanan AKP Kadék Citra Déwi Suparwati
nerangang, treké nyungkling kerana sopiré kiap lan rengas. Ulian trek nyungkling,
pamargin montoré di jalan Dénpasar-Gilimanuk mabelbelan. Sawatara jam 07.00
Wita, bangkén treké prasida kadérék. Nang
Satria
Tidak ada komentar:
Posting Komentar