Mangenang Ida Bhatara I Gusti Ngurah Rai Perang

Ida Tjokorda Anglurah Tabanan micayang tirta ring Wakil Bupati Tabanan I Komang Gede Sanjaya.

TABANAN, ISIN-GUMI

Wakil Bupati Tabanan I Komang Gedé Sanjaya ngrauhin pamuspan mangenang kaping 111 mantuknya Ida Bhatara I Gusti Ngurah Rai Perang ring Pura Batur Agung, Puri Gedé Tabanan, Wraspati (28/9). Manggala acara, I Gusti Ngurah Ani Aryanto maosang, Ida Bhatara I Gusti Ngurah Rai Perang wantah Raja Tabanan kaping 21. Ida Bhatara I Gusti Ngurah Rai Perang kajuk olih Belanda tur kaentungang ka Lombok. Ida Bhatara Ngurah Rai Perang tan kayun nyerah ring Belanda, tan arsa dados anték-anték Belanda nika mawinan raris nyédayang raga.

Wakil Bupati Tabanan I Komang Gedé Sanjaya marasa garjita polih nyaksiang tur nyarengin pamuspan mangenang Ida Bhatara I Gusti Ngurah Rai Perang. Dané ngaku bangga kerana lelintihan Ida Bhatara I Gusti Rai Perang sané mabéla pati tur tan nyadia dados anték-anték Belanda. Tan arsa panjak dané ring Tabanan kajajah Belanda. “Nika negesang Raja Tabanan mahardika ring politik, ékonomi, lan budaya,” ucap Wakil Bupati Sanjaya.  Dané ngingetang para jana bilih-bilih para yowanané mangda tan lali ring lelintihan sejarah. Nang Satria