Pitbul Pak Polisi Léb, Sirah Dadong Seneng Kacegut Kanti Maan 50 Jaitan

Sirah Wayan Seneng majait kerana cegut pitbul

TABANAN, ISIN-GUMI

Cicing Pitbul druwén Kompol Gedé Suwardika saking Banjar Munggal, Désa Kukuh, Kecamatan Marga, Tabanan ngeleb tur nyegut anak alit dan dadong di Banjar Pakraman Munggal, Redité (5/6). Kalih diri krama sané kacegut inggih punika Ni Wayan Seneng, 61, lan Kadék Kris, 7. Makakalih sané kacegut cicing kaubadin ring RSUD Mangusada, Désa Kapal, Kecamatan Mengwi, Badung. Seneng kacegut, kakedeng kanti labuh matatu akéh pisan. Sirahné kanti polih 50 jaitan.

Seneng wantah pisaga delod umah saking sang nuwénang cicing. Kadék Kris wantah kulawarga tunggalan sanggah saking Désa Selanbawak, Kecamatan Marga, Tabanan. Manut panuturan mantuné Seneng, Ni Luh Nyoman Suciani, 33, kala punika ipun ningehang di pisaga dajan umahné, wénten anak makalukan. Ipun sareng matuanné, Wayan Seneng lantas nengokin. “Dugas punika titian nyingakin Kadék Kris gébég cicing. Liu anak nulungin apang nyidang ngelésang uling bungut cicingé,” ucap Suciani, Sukra (10/6).

Ipun nuturang, Kadék Kris anggona cucu tekén matuanné malali ajak bibikné sig jumah Gedé Suwardika ané manyama tunggalan sanggah wayah. Dugas punika Kadék Kris kagandong olih bibiné. Nadak sara, cicing Pitbull mawarna coklat gelahné Gedé Suwardika léb uling kandangné tur nyagjagin Kadék Kris. “Simalu batisné kacegut, lantas limanné. Kéwéh sajan ngeléséng. Isin liman lan batisné kanti ngenah,” imbuh Suciani sakadi katiru saking harian umum NusaBali, édisi Sabtu (11/6).

Disubané pradisa ngelésang cegutan pitbullé, Kadék Kris kapenékang ka mobilé pacang ajaka maubad ka RSUD Mangusada. Cicingé ngepungin lantas mawalik kala dadong Seneng teka madengokan. Kabenengan dadong Seneng dugas ento nyaluk baju barak patuh cara Kadék Kris. Cicingé ané mabalik nyagjagin tur negor dadong Seneng. “Tangan tengawan matuan tiangé tegor tur kedéng cicik kanti labuh,” imbuh Suciani. Disubané labuh, cicingé lantas negor midehan. Kuping kantos sirahné tegor cicing. Disubané sida kakelésang, cicingé lantas celepanga ka kandang.

Kadék Kris lan Seneng kaplaibang ka RSUD Mangusada apang maan pengobatan. Makejang prabia di rumah sakit katanggung olih Gedé Suwardika. Santukan buut puniki ring pakubon kulawarga, makejang paturu ngaksamayang. Perbekel Désa Kukuh, I Ketut Budiarta nerangang, ipun polih laporan unduk Pitbull nyegut kalih krama punika. “Sami sampun paturu ngaksamaang. Manut orti, sang nuwénang cicing mianin makasami ubad ring rumah sakit,” ucap Budiarta. Ki Sanak