 |
| Kaketus saking NusaBali, Rabu 1 Juni 2015 |
Sinalih tunggil krama Banjar Gunung Sari, Désa Jatiluwih, Kecamatan Penebel, Tabanan, I Madé Tinggal, 70, suud cegut cicing lantas kedeng cicing. Ipun paid cicing sawatara johné 2 metér. Tatuné rahat pisan kantos kelopak paningalanné matatu. Ipun polih kaubadin ring bidan lan Puskesmas Penebel I sadurung ngamar ring BRSUD Tabanan. Madé Tinggal cegut cicing rabiés, Soma (30/5) di jumahné. Manut pianakné Madé Tinggal, I Nengah Sumidra Yasa, 40, bapané cegut cicing sawatara jam 06.30 Wita suud mabanyu utawi nginceh. Daweg punika, cicing gading negor batis lan limanné. Tinggal sané sampun ruyud bah tegor cicing. Disubané bah, kaambed ban cicingé lan kapaid sawatara johné duang méter uling tongosé bah. “Dugas bah punika, cicingé nyegut muan bapan tiangé. Kelopak matan ipuné matatu,” ucap Sumidra Yasa ring BRSUD Tabanan, Anggara (31/5).
Sumidra Yasa nuturang, dugas tegor lan paid cicing, bapané maan kauk-kauk ngidih tulung tur nglangseg cicingé aji tulud. Nangin kerana bayuné sampun soak, ipun tan prasida nglawan cicingé. Dugas bapané cegut lan paid cicing kantos di diwangan umahné, Sumidra Yasa tusing ada jumahné kerana luas ka tegalanné. Tuah pianak ipuné, Ni Kadék Yuliantina, 19 (cucuné Madé Tinggal) ada jumah, nanging sirep kerana sakit. “Aget wénten pisaga nepukin bapan tiangé paid cicing. Pisagané lantas mlaibang ka bidan,” imbuh Sumidra Yasa. Bidan lantas nujuhang maubad ka Puskesmas Penebel I sané magenah ring Désa Penebel. Mapan tatuné gedé, Tinggal lantas karujuk ka BRSUD Tabanan. Tatuné Madé Tinggal liu pesan, di batis, lima, muang muané. “Bapan tiangé sampun polih VAR lan SAR. Manut dokter, bapan tiangé harus ngamar,” tegas Sumidra Yasa. Kantos Anggara (31/5), Tinggal kantun kaubadin ring BRSUD Tabanan. Ki Sanak
Tidak ada komentar:
Posting Komentar