Rim Loader Blong, Nglindes Drainase di Dukuh Pulu Kaja

Camat Selemadeg Timur I Gusti Putu Ngurah Darma Utama nampingin pengawas Dinas Pekerjaan Umum Tabanan nyelehin proyek ring Banjar Dukuh Pulu Kaja, Désa Mambang, Kecamatan Selemadeg Timur, Tabanan, Soma (9/5).

TABANAN, ISIN-GUMI 

Bibih jlinjingan utawi drainasè sané kawangun di Banjar Dukuh Pulu Kaja, Désa Mambang, Kecamatan Selemadeg Timur, benyah. Bibih drainasè uwug kerana kelindes olih loader. Drainasè puniki uwug salantang 16 méter. Tiosang ring punika, jlinjingan ring arep jeroné I Gedé Adi taler wug lindes loader. Kocap loader punika rimné blong. Manut buruh proyék, Sumaji, 63, bibih draninasè lindes loader duk Sukra (27/5). 

Kala punika, loader mamargi saking kaja ring jalan nuunang. Tan pasangkan, saking kelod wénten sepéda motor plaibné rengas. Mapan marginé cupit tur ngelidin tabrakan, sopir loader ngipekang setir ka tangebot. Pamuputné loader majalan ngleseh nuunang kerana sing dadi rérénang. Ban loaderé ngenjek bibih drainasè kantos uwug. Sawatara 16 méter majalan nyeleseh, loader mara mareren disubané nomplok jlinjingan di arep jeroné Gedé Adi. “Kocap rim loaderé blong. Nika mawinan bibih drainasèné uwug,” ucap Sumaji, Buda (1/6). 

Nanging krama di Dukuh Pulu nyangsiang kualitas proyéké puniki. Kocap adukan luluhé tusing adung. “Da ja loader, lindes ban montor gén bibih drainasé uwug. Campuran semènné sing adung,” tarka sinalih tunggil krama. Indiké punika sampun kasaduang sareng Camat Selemadeg Timur. Camat Selemadeg Timur I Gusti Putu Ngurah Darma Utawa matutang wénten pasadu saking krama. Dané naenin tedun ka genahé punika nampingin pengawas saking Dinas Pekerjaan Umum Tabanan duk Soma 9 Méi 2016. “Pengawas nikaang sampun nganutin bésték,” ucap Darma Utama. 

Kepala Dinas Pekerjaan Umum I Gusti Ngurah Anom Anthara negesang, bibih drainasè ring Dukuh Pulu punika sampun becik. Nanging dugas lindes loader, during becik tuhné. Katuturang, mecikang margi nganggén hotmix tur drainasé saking Banjar Bunut Puhun Désa Bantas Kecamatan Selemadeg Timur kantos Banjar Dukuh Pulu Kaja Désa Mambang salantang 2,5 kilométer saking Dana Alokasi Khusus (DAK). “Bibih drainasè punika uwug sangkaning lindes loader,” teges Anom Anthara. Ki Sanak