Ada Macan Gading lan Macan Ireng di Pura Aseman, Désa Bengkel Sari

Mangku Marwa di Pura Aseman, Banjar Bengkel, Desa Bengkel Sari, Kecamatan Selemadeg Barat, Tabanan.

TABANAN, ISIN-GUMI

Pura Aseman ketah kasambat Pura Piling di Banjar Bengkel, Désa Bengkel Sari, Kecamatan Selemadeg Barat, Tabanan, wantah pura tetamian pratisentana Arya Belog. Kocap kacerita, ring pura puniki wénten Macan Gading lan Macan Ireng. Makakalih duwé puniki wénten ring alas suci wewidangan pura. Reko orti nglimbak Macan Gading lan Macan Ireng puniki sawai sinah kala dina Buda Kliwon lan Tilem.

Pamangku Pura Aseman, Wayan Marwa, 50, nerangang pujawali di Pura punika ngenem sasih apisan kala Anggara Kasih Kulantir. Rikala anggara kasih nyabran sasih setata ngaturang piodalan alit. Nanging duwé pura marupa Macan Gading lan Macan Ireng paling sawai sinah rikala dina Buda Kliwon lan Tilem. Lianan tekén Mangku Marwa, okan danéné, Ni Madé Érawati taler naenin nyingakin duwé pura punika. “Pianak titiangé kanti geleh selami tigang dina. Raris katangkilin ka pura, wau kajati mula,” tutur Mangku Marwa, warsa 2013 lintang.  

Mangku Marwa ngawewehin, krama Banjar Bengkel lan krama tiosan banjar taler manggihin Macan Gading lan Macan Ireng punika. “Wénten sané nyingakin, taler wénten sané ngasanin,” tutur Mangku Marwa. Tiosan ring macan, taler wénten ula utawi lelipi. Ula punika mawarna selem, matané ngendih barak. Ula puniki taler sinah rikala dina sané kasenengin. Mangku Marwa ngaku polih nyingakin apisan kémanten ula puniki. 

Tiosan ring orti duwé Macan Gading, Macan Ireng, lan Ula Selem, wénten tetamian nénten dados ngaturang ulam bawi rikala pujawali. Wantah bèbék kémanten dados aturang anggén ulam banten. Tiosan ring pura, kulawarga pamangku Pura Aseman taler tan kadadosang ngajeng ulam bawi. “Yéning durung kawinten dados pamangku dados ngajeng ulam bawi. Nanging yén ring kulawarga punika wénten dados pamangku, nénten purun malih ngajeng ulam bawi,” bawos Mangku Marwa.

Dané nerangang, dumun naénin kulawargané sané sampun kajodi dados pamangku ngrapu ngajeng ulam bawi. Panadosné keni upas. “Dumun sadurung dados pamangku, tan kenapi,” ucap Mangku Marga. Kaceritayang, duk ngenteg linggih warsa 1993, krama pangempon sané makemit ring Pura Aseman sakadi mirengang suara batu ageng ulung nepén kakareb palinggih. Nanging rikala katuréksain, nénten wénten napi.

Pura Aseman puniki magenah doh saking padunungan kramané. Pura tetamian pratisentana Arya Belog saking Puri Kaba-kaba, Kecamatan Kediri puniki mageneh ring tegalan krama. Genahné sané sepi tur sripit ngawinang purané madurgama. Wénten 70 kulawarga dados pangempon, saking Tabanan, Jembrana, lan Mengwi Badung. Mangku Marwa narka akéh kramané rauh tangkil ka Pura Aseman pacang nyeraya nunas kasaktian lan kasidian. Santukan sabilang semengan rikala Mangku Marwa ngayah mareresik, setata nyingakin leluun canangsari. “Kramané tangkil praragan nénten matur piuning ka pamaksan lan pamangku. Manawi sané rauh jagi nyeraya nunas kerahayuan lan tiosan,” atur Mangku Marwa. Ki Sanak