Malénan

“Jangih sajan munyin pak ketuané. Yén ba ningehang pak ketua magending di pura, jeg landuh santi karasayang guminé. Ainé panes nyentak dadi tis. Pak ketua mula top,” Wayan Purna ngajumang Ketua DPRD-né.

Ketua DPRD di kabupatén titiangé, Putu Arya kasumbung dadi pragina, raos janiné seniman. Seniman serba bisa kaucap. Uling teruna dané mula demen magending, ngelah sekaa shanti kanti grup band. Tambal Band adan grup musikné. Dugas teruna, dané nunas ajah di sekolah seni. Dueg pesan karawatitan, ngigel muang magending. Uling enu masekolah di SMK, dané kapilih dadi sekaan arja. Ulian dueg ngabanyol, kasudi dadi Kartala. Lengut pisan ngomong di kalanganné, macingklak raos ajak Punta makada panontonné briag-briag kedék nganti nyakitang basang.

Ané makada angob, Putu Arya rikala ngabanyol tusing taén ngomongang jaruh-jaruh. Papayasanné masé polos. Tusing cara pragina cara janiné, payasné makalé, panganggonné masé macladukan. Kadi rasa banyolan papayasanné saihang tekén satuané. Yadiastun ngranyab papayasan praginané jani, karasayang cara katimbambung, ngrénéb di sisi nanging di tengahné puyung tan paisi. Ulian kéwéh ngaénang panontonné kedék ané jejehang pragina inguh maimbuh pesu ka kalanganné tusing mabaju lan majalér apang nyidang ngaénang anaké mabalih kedék ingkel-ingkel. Yén terus-terusan kéto pragina ngandelang papayasan lucu tan pangisinin déwékné taksu maraosan sinah praginané énggal nyrégség ngeséng kauh.

Lén Putu Arya, ia tusing ngutamayang papayasanné aéng ngrénéb nganging ngutamayang munyinné misi. Ento makada ia demen mamaca buku. Kéto masé mabalih stand up comedy. Pragina lawak di dura Bali sing nyaratang papayasan, nanging otakné kapempenin ilmu pengetahuan. Mirib baan demen malajahang sastra, Putu Arya énggal kasub dadi pragina yadiastun wimuda tuwuh. Di tengah kalanganné, Putu Arya nyrémpétang raosné unduk aab jagaté. Sakadi réklamasi, korupsi, muang ané dadi bantang carita utawi trending topik di média massa. Panontonné angob kerana Putu Arya ngenah dueg. Bani ngadu kadueganné ajak tukang ngomong di acara Indonesia Lawyer Club di tiviné.

Dugas enu masekolah, ia seleg malajah, kéto masé lais ngurukang sekaa di désa magambel muang mashanti. Awai bisa di telung tongos ia ngurukang. Ané makada angob, di kulawarganné tusing ada sentanan pragina, nanging Putu Arya nadak dari pragina ulian masekolah lan seleg malajah. Ané ngranayang dané kadaut dadi pragina kerana uling cerik sawai ajaka mabalih wayang kulit tekén pekakné. Kéto masi demen ningehang arja di radio. Paling sawai ajaka mabalih Wayan Lodra, Gedé Yudana, Pétruk Dolar, sekaan drama gong Bara Budaya. Ada masé sekaa gong Bintang Bali Timur, Komang Apel, Dabdab, lan Kiul.

Dugas SMP makeneh dadi dalang. Dugas ento, I Gusti Ngurah Ketut Sudiartha uling Désa Kukuh, Kecamatan Marga, sedeng kasub ngwayang. Tuturné lemuh maimbuh banyol. Kala ento, Wayan Nardayana uling Belayu masé sedeng muruk ngwayang. Nardayana jani kasub ngigelang wayang Cénk Blonk. Uling sekat ento, Putu Arya seleg malajah makakawin. Uwakné ané ngurukang.

“Stutinira tan tulus. Sinahuran paramarta Siwa,

Anaku huwus katon abimatanta. Temun ta kabéh,

Hana panganugrahang ku Cadu Sakti. Winimba sara,

Pasupati sastra kastu pangarania. Nihan wulati.”

Ulian demen ngurukang magamel, mashanti, maimbuh dueg ngraos, Putu Arya kasudi dadi manggala Sabha Yowana di désa pakraman. Disubané ngantén, kasudi dadi béndésa adat. Nah, dugas dadi bendésa adat, dané kapaekin olih sinalih tunggil tokoh partai. Kaajakin dadi pengurus partai.

“Yén Putu nyak dadi pengurus partai. Kayang pemiluné dadiang men Calon DPR. Jani guminé suba mabading, Pak Harto suba léngsér kaprabon. Binginné suba pungkat. Jani lan ngalih bada. Ditu sampiné sedeng mokoh-mokoh. Uling pidan sampiné tusing ngelah tongos maembon, jani mirib nyidang nyéngot ngapér,” sinalih tunggil panganggon sampi utawi pengurus partai ngajakin Putu Arya dadi prajuru.

Putu Arya satinut, apabuin liu nepukin babotoh di tajén makejang ngalih bada sampi. Bawak satua, Putu Arya dadi pengurus di kecamatan. Dugas pemilihan umum duk orde baru nyréndéng maimbuh, binginné pungkat sénggot sampi. Putu Arya paling liu maan suara. Disubané kalantik dadi DPR, dané maan panugasan partai dadi pimpinan déwan, negakin kursi ketua DPR.

“Pak Ketua, sing nyidang ngayah mashanti? Ada tongos melah di Simpang Siur. Yén ditu mashanti jeg pasti luwih!” Wayan Purna ngajakin.

“Pura apa di Simpang Siur?”

“Boya pura, puri ditu. Pokokné tongosé kéné. Lan jani kema!” ucap Wayan Purna sinambi ngacungang ibu jariné.

“Mulih malu nyemak kamen, udeng lan senteng. Cara sing nawang sasana ka puri asané Wayan. Jeg kadropon,” saut Putu Arya.

“Araaaaaaaaaaaaaaaaaaah. Jeg mai, titiang nyetirin!”

Di tengah mobil nuju Simpang Siur, Wayan Purna nyritayang tongosé mashanti tan bina kadi kadatuang Sang Rahwana di Alengka Pura. Manik dumilah, widyadari liu ditu. Kéto masé inum-inuman ané kademenin ada ditu. Malénan bandingang mashanti di pura muang ngayah di jumah anak kalayu sekar, tuah maan inuman botol tanggung maimbuh biu gadang apang landehan kakolonganné magending. Yén di Simpang Siur, inumanné dadi pilihin, ané demenin Dewa kanti ané démenin Denawa ada ditu. Yén mashanti di Pura kolonganné serak nyak buin miké usak, corongé baduur jebol. Yén di Simpang Siur, sound system mautama ngenén. Munyinné pacang masaih ajak Ariel Noah.

“Yén mashanti di banjar muang jumah anak kalayu sekar, mati listrik mara maan mamik’an. Yén di Simpang Siur, sabilang jahan maan mami lan mamik’an,” ucap Wayan Purna nyaihang tongosé mashanti.

“Kal bingung bli, Yan?”

“Ataaaaaaaah, pak ketua da bingung. Lan ngalih liang, di li tongos liange!”

“Wayan punyah né?”

Sing karasa mobilé macelep di Underpass, betén patung Bima Déwa Ruci. Tusing makeloné mobilé macelep nganginang.

“Dini ba tongos melah mashanti pak ketua.”

Putu Arya inguh ngenehang. Nyang abedik tusing ngresep. Tan bina sampi kacucuk cunguhné, dané nuutang Wayan Purna. Macelep di kamaré. Wayan Purna ngancan bingung, kamaré peteng, tivi lombéng tatelu majéjér. Sofa dawa membat di kamaré. Tusing buin makeloné, duang diri anak nyegég macelep ngaba minuman. Saklar kakletékang, lampuné mati. Sunaran di kamaré ento tuah uling tivi.

Wayan Purna pangus nundén bajang jegég di samping milihin lagu. Gendingang Bali kapilih. Kabenengan ada ‘Song Brérong’.

“Néh bos, magending malu. Kadén demen ngendingang Song Brérong!” Wayan Purna ngenjuhang mik.

Putu Arya maketketan. Tumben macelep ka tongos mashanti soléh. Kasediaang inum-inuman denawa. Kadampingin widyadari. Karasa kekeh awakné apabuin bajang jegég di sampingné masiot gantut nganti dalemanné ngenah. Ngancan inguh Putu Arya di tongosé ento. Mapan sing nyak nyemak mik, payu Wayan Purna magendingan. Ngrikik Wayan Purna nepukin ketua DPRné negak bengong cara patung urut-uruta tekén bajang jegég di sampingné.

“Aruh, dadi kéné tongosé nah. Yén dadi bendésa, mashanti di pura. Mara dadi ketua déwan jeg ajaka karaoke,” ucap Putu Arya di ati.

“Maaf dik, saya keluar!”

Ngénggalang Putu Arya macelep ka kamar mandi. Yadiastun tusing minum, ia ngutah di WC. Disubané mabersih, ia buin pesu tur negak di sofané.

“Bos, santé gén. Sing ada anak nawang mashanti dini!” Wayan Purna ngalus-ngalusin kerana Putu Arya nagih mulih.

Putu Arya bengong cara kebo mabalih gong. Bajang jegég di sampingné terus mangoda. Sakadi Arjuna matapa di gunung Indrakila kukuh teguh yadiastun kagoda widyadari. Widyadariné di sekala lantas ngenjuhang minuman.

“Maaf, saya tak biasa minum alkohol,” nampokang inuman ané enjuhanga tekén waitrisé.

“Minuman ini membuat rileks,” alus waitresé ngrayu.

“Inem bedik bos, cicipin dogén apang tawang asané. Pokokné tenang sing kal orang-orang,” Wayan Purna nyekenang.

Ada duang sloki ngerosang inumanné, Putu Arya ngrasayang anget tangkahné.

“Mai aba pok mike. Alihang gendingangan Sewu Kuto,” Putu Arya nyemak mik di méjané.

Madejit ia bangun uling sofané maimbuh ngedeng bajang jegég di sampingné majogédan. Mara Putu Arya ngasanin luwung bayuné mara kena inuman duang sloki.

“Mau striptis, tidak? Aku banyak uang nih!” ucap Putu Arya.

Plek. Kamaré mameteng.

Musiké jedug-jedug. Sunaran tiviné ngaé kamaré remrem. Tanglus Putu Arya nepukin waitrisé ngigel. Lemuh sajan, sakabesik kainné ketes tan bina cara film di tiviné. Waitris terus ngigel nuutang musiké jedug-jedug. Putu Arya ngancan angguk-angguk sambilang limané paling nyeluk. Nyeluk kantong ané ngancan bolong.

Kukuh, Sukra Paing Mata, 22 April 2016

Galah 09.19 Wita.