MJ

YÉN nyambatang JM jani kamuh. Ada ngartiang jénderal manajer, ada masi nyambat jero mangku. Pidan saja, yén ngraosang JM pasti katuju ka jénderal manajer di hotél. Jani anak suud maékajati di pura masi kasambat JM, raos bawak jero mangku.

Ketut Semal, paling demen kakaukin JM. Tuah saja Ketut Semal mawinten di Pura Dalem. Yén ada anak ngaukin jero mangku, ia ngedésem ngédéngang semu masem. Rikala kaukina JM mara demen, cara Mélem kenyem-kenyem suud kena berem. Di désan tiangé kamulan ané dadi pemangku di pura tuah madasar garis keturunan. Tusing ada anak ngelamar dadi pemangku sakadi ngelamar JM di perhotélan. Biasané yén suba tuané lingsir, pianakné ané ngentinin. Pajalanné satondén dadi pemangku liu ané sing mulus. Pamekasné ané kapingit tur tusing ngugu cecirén ané lakar dadi pemangku. Biasané ané mamengkung sawai kasakitin. Maimbuh sakitné tawah-tawah. Ada nginguh cara anak buduh. Turéksain ka dokter, tusing ada ngenah sakitné. Laut ada anak nyambatang sakit amah léak. Yén tunasin di balian sonténg, maan gambaran kapingit di pura. Yén nyak mawinten dadi mangku biasané seger oger kajatimula.

Kéto masih ané nibénin Ketut Semal. Ia maan sing percaya tekén pituduh Widhi apang mawinten dadi pemangku sawiréh bapané suba lingsir, tusing nyidang ngayah di pura. Ketut Semal cendek tusing ngugu, yadiastun liu balian sonténgé ané tunasin raos nyambatang ané patuh. Pituduh Widhi apang Ketut Semal mawinten dadi mangku di Pura Dalem. Ketut Semal tusing ngugu baan marasa déwékné tusing pantes dadi mangku. Sawiréh belog maimbuh tusing nawang sastra agama. Ia sadar, enu demen mamunyah, kéto masih taén ngerasayang dadi bégal. Awak macocoh matato. Sawai dadi centéng anggota déwan apang nyidang maroko. Tusing taén nawang tutur agama, pragat nyalanang panca soléh. “Sing saja iraga dotang bhatara dadi mangku. Iraga préman tusing beriman. Apabuin raga belog tusing taén ngecapin sekolah. Tusing nawang anacaraka, kénkénang kal bisa maca mantra,” kéto Ketut Semal mesuang munyi di keneh dugas tuturanga munyin baas tekén kurenané.

Disubané kasakitin tur tusing seger-seger diastun suba liu ngalih dokter lan balian, ditu ia mara ngugu. Saja disubané mawinten, ngangsan seger. Uli sekat dadi mangku, Ketut Semal malajahang déwék nyalanang sesana kepemangkuan. Pidan tusing demen malajah sastra, jani suba masalin. Sabilang peteng satondén sirep lan mara bangun semeng, ia nyemak cakepan. Malajah mamantra, sanista-nista apang nawang mantra penuntun nyalanang panca sembah. Marasa kimud kenehné yén nuntun pemedek tusing ngantebang mantra rikala ngaturang panca sembah. Kéto masih Ketut Semal malajah Tri Sandhya. Semeng, tengai lan peteng satata ma-Tri Sandhya. Ia masih nuntun kulawarganné sabilang sanja mabhakti di sanggah.

Nyaluk geginan dadi pemangku, Ketut Semal kapah nawang pesu. Diastun dugas pidan sawai ka kafé ajak pianakné. Dikénkénné bisa megarang céwék kafé ajak sentanané. Ané ngaé kedék ati, Ketut Semal tusing bani ngopak pianakné, mapan jejeh yéning pianakné nyambat tekén méméné yén bapané ngelah sepelan céwék kafé. Ketut Semal paling sawai maan SMS uling céwék kafé. Mapan sing nawang sastra, Semal sawai ngidih tulung tekén pianakné apang mamaca lan ngwales SMSé.

“Ingetang nyen Tu, suud mamaca SMS lan BBM sépanan hapus. Bapa jejeh méméné malin hapé tur mamaca SMS muang BBM. Nyanan ada perang dunia ketiga di kulawarga makejang dadiné kéweh. Putu dadi nawang bikas bapané, dadi nutug ka kafé, kéwala sing dadi uyut, apabuin nyambat ajak méméné!” kéto Ketut Semal ngorin pianakné ané sawai nutug ka kafé.

Jani disubané dadi pemangku, yadiastun enu ada kenehné nelokin céwék kafé, nanging Mangku Semal nyidang ngelekin puesné. Lek kenehné suba maudeng putih, mabaju lan makamen sarwa putih enu demen gliang glieng ngorta kangin kauh di kafé. Yadiastun enu kenehné gaul, Mangku Semal tusing juari lémpas tekén sesanan pemangku. Tuah abesik pangidihné tekén nyama braya lan kulawarga. Pangidihné apang tusing ngaukin jero mangku, nanging ngaukin JM, apang ada masi sisan gaulné. Liu nyama brayané nyambatang, sasukat ia dadi mangku, pajalan hidupné suba masalin. Yén pidan kasub dadi preman, jani nadak suba beriman. Pidan kasub dadi tukang centéng, jani nyak ngubuh céléng. “Sasidan-sidan tiang malajahang déwék, nyalanang sasana dadi pemangku apang ngancan kagugu, tur disubané tua maan tongos ané liu katuju,” ucap Mangku Semal.

Mangku Semal diastun suba dadi pemangku tusing lek ngortoang jelék hidupné pidan. Uling SMA suba demen ngelua. Kéto masih dugas SMA suba nawang ngasanin hidup cara anak makurenan. Dugas ento ia ngelah tunangan, sawai ajaka mulih lan sasai malaksana cara anak masomahan. Tunanganné anut adung, tusing bani tempal baan takut kapegatang tresna. Dugas SMA, Ketut Semal masih ngaku ngelah mitra, nemenin anak tua. Cara gendingan Tulilu pakaryanné Bayu KW. Anak bajang metunangan ajak anak tua, kéto masih anak tua ngelah tunangan bajang. Semal masih demen ngemaukin rerama. Ngaku mayah kéné kéto di sekolahan. Pipis baan memauk ento telah tan paguna. Telas saplar di tajen. Kedas di méja cékian.

Tusing maan ngisinin kenehné, Ketut Semal mamégal. Baan gedé gangsuh bungkulanné, baan gedé siteng lengenné, Semal sakadi sang Bhima nyapa kadiaku. Liu anak centéngina tagihina pipis. Yén sing baanga, nyagurin. Ulian laksanané ané tusing melah, Semal taén maprekara di kantor polisi. Nanging tusing nganti masuk bui, damai majalaran kakulawargaan. Taén maurusan di kantor polisi, tusing ngaénang Semal kapok malaksana jelé. Jeg tusing taén suud ngaé buut di kulawarga. Apang maan pabelin roko, dugas paek-paek pemilu, Ketut Semal paling lais dadi centéng partai. Dugas dadi centéng masih taén maprekara, baan kalaporin mutbutin kobér partai, tur nyempal anak nganggon keléwang. Nanging Semal tusing mabui, baan partai ané kabéla gelahné bupati, maimbuh ané kasempal lan kobér ané kabutbut musuhné bupati. “Kéto laksanan bapa JM dugas tondén dadi mangku,” tuturné Mangku Semal, dugas tiang nangkil ka jeroné ngaturang canang tetangi.

Jani Mangku Semal suba malajah apang satata malaksana, mapineh lan ngraos ané luung sakadi panuntun Tri Kaya Parisudha, wacika, manacika lan kayika. Mangku Semal masih nyambatang unduk karmaphala di guminé. Unduk karmaphla, Mangku Semal nyambatang enu nyalananin sisan-sisan dosané ipidan. Mapan, sakancan gaé ayu ané kajalanin tondén ngenah sariné. Pamekas pianakné, Putu Godogan ané magaé di kantor bupati. Yén telisik uling golongan pantesné suba sugih, malahan lebih. Sawiréh sawai maan bati nyaloin tanah.

“Kéwala penelahné bapa JM tusing ngerti. Jeg nyak cara gendinganné Anak Agung Raka Sidan. Gajih telah di sepirit, batin tanah telah di kafé. Mirib lintang bubuné bolong, pipisé telah di song brerong. Pelih bapa JM masih pidan, demen ngajakin pianak malali ka kafé,” ucap Mangku Semal.

Liu tuturné Mangku Semal nyambatang pajalan hidupné pidan. Mangku Semal masih nyambatang angob, nguda liu préman jani nadak beriman. Mirib suba garis hidup, prémanné nyiksik bulu, disubané nemu jalan ada dadi pamangku, kéto masih dadi sulinggih.

“Bapa JM pidan masih préman. Ulian ento JM pidan sing ngugu dotin bhatara dadi pemangku. Bapa JM cenidra Ida Bhatara keliru nentuang pilihan. Nah suba kéné jani, bapa JM nyalanin pituduh Widhi,” ucap Mangku Semal.

Yén pirengang tuturné Mangku Semal sinah suba tobat tekén pajalan hidupné ané selem. Anak lén mirib ngugu, yén tiang sukeh asané ngugu. Diastun suba maékajati dadi pemangku, Mangku Semal tingalin tiang tondén nyidang ngeret indria. Mangku Semal tondén pantes kasambat JM, yén tiang ngemaang cap MJ.

Cenindran tiangé mabukti, Mangku Semal maprakara di kantor polisi. Ipun katuduh melingin anak bajang cerik. Kabenengan dugas Mangku Semal neked di kantor polisi, tiang nepukin tanganné kacangkling tur maborgol. Nguntul Mangku Semal maimpas ajak tiang dugas macepuk di kantor polisi. Mapan mapisaga, tiang ngidih izin ajak kepala kepolisian apang maan ngorta ajak Mangku Semal di ruangan penyidik.

“Dé, da ngenahné bapa JM di koranné! Yén nganti ngenah di koran sinah ambiug guminé, apang sing ulian bapa JM désan iragané cemer. Apang sing nganti aduk sera aji kéténg, ulian bapa JM malaksana keliru, pemangkuné sajebag Bali dadiné cemer. Bapa JM ngidih tulung tekén Made, orin timpal-timpal wartawanné makejang apang tusing nulis bapa JM. Yén unduk buka kéné nganti ngenah di koran, satmaka Madé makecuh marep menék. Ngortoang jelék pemangku agama padidi. Kénkén carané jani Madé ngengkebang, apang tusing laksana mangku a diri dadiné pemangkuné sajebag Bali macolék pamor. Sing cocok asané keto, Dé?” ucap Mangku Semal.

Maan tutur kéto tiang mineh-minehang déwék. Beneh sajan apa ané ucapanga tekén Mangku Semal. Pemangku marikosa anak bajang cerik kacatri di koran sinah ngortaang jelék sulinggih padidi. Yén sing penékang koran, nyanan Mangku Semal ngancan ngelunjak, kecas kecos mongkod bangkiang bajang lénan, apabuin swadharma dadi wartawan mula nyurat ané saja-saja.

“Bapa JM saja suba dadi mangku. Maudeng putih anggon ngeret indria, mabusana sarwa putih apang laksanané suci. Kéwala bapa JM masih manusia biasa, patuh cara Chi Pat Kaé jeg puesé satata ngetél yén nepukin paha putih,” ucap Mangku Semal, ngimbuhin.

Ngedebris tiang kedék ningehang. Saja jujur Mangku Semal. Diastun mabusana sarwa putih apang laksana katuntun suci, nanging yén nepukin anak luh mapaha putih prajani lélor. Béh, yén kéto suud kaukin JM, ganti dadi MJ: Mangku Jaruh.